काठमाडौं । सरकारले शहरी विपन्न नागरिकका लागि सुपथ र सुलभ खानाको व्यवस्था गर्ने भएको छ । काठमाडौं उपत्यकाको कम्तीमा १० स्थानमा उक्त व्यवस्था गर्ने भएको हो ।
अर्थमन्त्री जनार्दन शर्माले शुक्रबार प्रतिनिधिसभामा बजेट विनियोजन विधेयक प्रस्तुत गर्दै यस्तो जानकारी गराउनुभएको हो । शुक्रबार नेकपा एमालेको विरोधका बीच अर्थमन्त्री शर्माले विनियोजन विधेयक पेश गर्नुभएको हो ।
उहाँका अनुसार शहरी विपन्न नागरिकहरुका लागि सामाजिक संस्थाहरुको सहकार्यमा सुपथ तथा सुलभ खानाको व्यवस्था गरिनेछ ।
यस्तै, सरकारले विपन्न दलितहरुको आर्थिक, सामाजिक, सांस्कृतिक समस्याहरुको सम्बोधन गरी जीवन स्तर उकास्न एकीकृत कार्यक्रमहरु संचालन गर्ने भएको हो ।
सरकारले चालु आर्थिक वर्षको लागि नयाँ बजेट ल्याएको छ । सरकारले अध्यादेश मार्फत १६ खर्ब ३२ अर्ब ८३ करोड रुपैयाँको बजेटको प्रतिस्थापन विधेयक ल्याएको छ ।
वि.सं.२०७८ भदौ २५ शुक्रवार १७:१४ मा प्रकाशित