काठमाडौं । हाइड्रोइलेक्ट्रीसिटी इन्भेष्टमेन्ट एण्ड डेभलपमेन्ट कम्पनी (एचआईडीसीएल)को हकप्रद सेयर बाँडफाँट भएको छ । कम्पनीले भदौ २६ गते हकप्रद सेयर बाँडफाँट गरेको हो ।
कम्पनीले साउन ५ गतेदेखि भदौ ८ गतेसम्म विद्यमान चुक्तापूँजी ११ अर्ब रुपैयाँको आधारमा १०० रुपैयाँ अंकित दरको ११ करोड कित्ता हकप्रद सेयर निष्काशन गरेको थियो ।
रितपूर्वक आवेदन दिएका १ लाख ९६ हजार ४२४ जनालाई ७ करोड ३६ लाख ७० हजार २७६ कित्ता हकप्रद सेयर बाँडफाँट गरिएको कम्पनीले जनाएको छ ।
तर, कम्पनीको ३ करोड ६२ लाख २९ हजार ७२४ कित्ता हकप्रद सेयर वितरण हुन सकेन । उक्त सेयर अब लिलामी प्रकृयाबाट बिक्री गर्ने कम्पनीले जनाएको छ ।
साथै आफ्नो कायम हक भन्दा बढी सेयर माग दरखास्त दिने आवेदकहरुको हकमा बाँडफाँटमा नपरेका हकप्रद सेयर बापतको रकम भदौ ३१ गते बिहीवारदेखि आईपीएस मार्फत रकमान्तर गरिने बताइएको छ ।
धितोपत्र निष्काशन तथा बिक्री प्रबन्धकमा ग्लोबल आइएमई क्यापिटल लिमिटेड रहेको छ ।
वि.सं.२०७८ भदौ २८ सोमवार ११:५२ मा प्रकाशित
