काठमाडौं । आन्दोलनरत सेयर लगानीकर्ता धितोपत्र बोर्डमा पुगेका छन् । विभिन्न १८ बुँदे मागसहित आन्दोलनमा उत्रेका सेयर लगानीकर्तालाई धितोपत्र बोर्डले बोलाएर छलफल गरेको हो ।
बोर्डले बोलाएर छलफल गरेको भएपनि निश्कर्ष निस्कन नसकेको पुँजी बजार सुधार संघर्ष समितिका संयोजक रोहन कार्कीले बताउनु भयो । उहाँका अनुसार लगानीकर्ताले राखेको मागमा केही बोर्डसँग सम्बन्धित भएकोले बोर्डसँग छलफल भएको हो । बोर्ड लगानीकर्ताको मागमा सकारात्मक भएपनि अहिले अध्यक्ष नभएका कारण छलफल निश्कर्ष बिहीन बनेको हो ।
लगानीकर्ताले सोमबार नै अर्थमन्त्री जनार्दन शर्मालाई भेट गरेका छन् । लगानीकर्ताले अर्थमन्त्री शर्मालाई भेटेपनि धेरै समय कुरा हुन नपाएको कार्कीको भनाई छ ।
मन्त्री शर्माले मंगलबार २ बजेको लागि पुनः बोलाएको कार्कीले जानकारी गराउनु भयो । उहाँका अनुसार मंगलबार नै राष्ट्र बैंकका गभर्नर महाप्रसाद अधिकारी वा अन्य अधिकारीसँग भेट हुने भएको छ ।
लगानीकर्ताले भदौ २३ गतेदेखि २९ गतेसम्म दैनिक १ घन्टा माइतिघर मण्डलामा रिले अनसन सुरु गरेका छन् । लगानीकर्ताले रिले अनसनको क्रममा गभर्नर महाप्रसाद अधिकारीको राजीनामा माग्दै १२० दिनको औसत मूल्य कायम गर्न, ४ करोड र १२ करोडको सिमा तत्काल खारेज गर्न आग्रह गर्दै आएका छन् ।
राष्ट्र बैंकले मौद्रिक नीतिमार्फत एक बैंक तथा वित्तीय संस्थाबाट ४ करोड रुपैयाँ र एक व्यक्तिले बढीमा १२ करोड रुपैयाँमात्रै सेयर धितोमा कर्जा लिन पाउने गरेको व्यवस्था गरेको छ । राष्ट्र बैंकले मौद्रिक नीति आएको तीन महिना नभइ आफ्नो निर्देशन परिवर्तन नहुने दाबी गर्दै आएको छ । यसले गर्दा लगानीकर्ताको माग पुरा हुने वा नहुनेमा भने अन्योल नै रहेको छ ।
वि.सं.२०७८ भदौ २८ सोमवार १८:०१ मा प्रकाशित
