काठमाडौं । नेपालमा भारतको हल्दियाबाट निजी क्षेत्रका लागि पहिलो कार्गो रेल वीरगञ्ज आईपुगेको छ ।
नेपाल–भारत रेल सेवा सुरु भएको १७ वर्षपछि निजी क्षेत्रको कार्गो रेल वीरगञ्ज आईपुगेको हो । नेपाल इन्टरमोडल यातायात विकास समितिका कार्यकारी निर्देशक आशिष गजुरेलका अनुसार हिम्ड टर्मिनल प्रालिको एक र्याकको कार्गो रेल आज (बुधबार) बिहान १० बजे वीरगञ्जस्थित सुख्खा बन्दरगाहमा आएको हो ।
गजुरेलका अनुसार उक्त रेलले खाद्यान्नको ९० वटा कन्टेनर लिएर सुख्खा बन्दरगाह आइपुगेको हो । अब रेलले सातामा दुई दिन कार्गो ढुवानी गर्ने छ ।
नेपाल भारतबीच २०६१ सालमा भएको नेपाल-भारत रेल सेवा सम्झौताअनुसार भारत सरकार स्वमित्वको रेलले नेपाललमा सेवा दिंदै आएको थियो । गत असार २५ मा अघिल्लो सम्झौता संशोधन भएसँगै निजी क्षेत्रको कार्गो रेल आएको हो ।
वि.सं.२०७८ भदौ ३० बुधवार १६:५० मा प्रकाशित