काठमाडौं । चालु आर्थिक वर्ष सुरु भएको दुई महिना बित्दा बजेट खर्च ५.४६ प्रतिशत भएको छ ।
बजेट ५.४६ प्रतिशत खर्च हुँदा राजस्व १४.३१ प्रतिशत संकलन भएको छ ।
महालेखा नियन्त्रकको कार्यालयका अनुसार यो अवधिमा ८९ अर्ब ९३ करोड ५८ लाख रुपैयाँ बजेट खर्च हुँदा १ खर्ब ६८ अर्ब ५७ करोड ७६ लाख रुपैयाँ राजस्व संकलन भएको छ ।
अर्थमन्त्री जनार्दन शर्माले अध्यादेश मार्फत आएको बजेटलाई प्रतिस्थापन गर्न ल्याएको विद्येयकबाट बजेट तथा राजस्वको लक्ष्य घटाउनु भएको छ । मन्त्री शर्माले प्रतिस्थापन विद्येयक मार्फत चालु आवको लागि १६ खर्ब ३२ अर्ब ८३ करोड बजेट विनियोजन गर्नु भएको छ ।
जसमा चालु तर्फ ६ खर्ब ७७ अर्ब ९९ करोड, पुँजी तर्फ ३ खर्ब ७८ अर्ब १० करोड, वित्तीय व्यवस्थापन तर्फ १ खर्ब ८९ करोड ९९ लाख रहेको छ । बजेटको संशोधनका क्रममा राजस्वको लक्ष्य १० खर्ब ५० अर्ब ८२ करोड रुपैयाँ, वैदेशिक अनुदान ५९ अर्ब ९२ करोड रुपैयाँ रहेको छ ।
भदौ अन्तिसम्ममा १ खर्ब ६८ अर्ब ५७ करोड ७६ लाख रुपैयाँ राजस्व संकलन भएको छ । यस्तै कर राजस्व तर्फ १ खर्ब ४८ अर्ब ५६ करोड रुपैयाँ संकलन भएको छ । कार्यालयका अनुसार गैह्र कर राजस्व तर्फ २० अर्ब १ करोढ ७६ लाख रुपैयाँ संकलन भएको छ ।
भदौ महिनासम्ममा ५.८३ प्रतिशत अर्थात ५८ अर्ब ५९ करोड ४९ लाख रुपैयाँ चालु खर्च भएको छ । यस्तै पुँजीगत तर्फ ०.६ प्रतिशत अर्थात २ अर्ब ६० करोड ८७ लाख रुपैयाँ खर्च भएको भने वित्तीय व्यवस्थामा २८ अर्ब ७३ करोड २३ लाख अर्थात १३.८२ प्रतिशत खर्च भएको महालेखा नियन्त्रक कार्यालयले जनाएको छ ।
अर्थमन्त्री जनार्दन शर्माले प्रत्येक महिना १० प्रतिशतका दरले बजेट खर्च गर्ने बताउनु भएको छ । दुई महिनाको अवधिमा ५.४६ प्रतिशत मात्रै बजेट खर्च भएको छ । उहाँको कार्यकालमा नै इतिहासमा पहिलो पटक आर्थिक ‘सट डाउन’ भएको छ । मन्त्री शर्माले भनेको जस्तो प्रतिमहिना १० प्रतिशत बजेट खर्च हुनेमा सबैले आशंका गरेका छन् ।
वि.सं.२०७८ असोज १ शुक्रवार १७:५७ मा प्रकाशित
