काठमाडौँ । सरकारले भोली (सोमबार) देखी पुनः कोरोना भाइरसविरुद्धको भेरोसेल खोपको दोस्रो मात्रा लगाउने भएको छ ।
स्वास्थ्य तथा जनसङ्ख्या मन्त्रालयका अनुसार असोज ४ देखि ६ गतेसम्म खोप लगाइने छ ।
मन्त्रालयका अनुसार जिल्ला स्वास्थ्य कार्यालय काठमाडौँले १४५ खोप केन्द्रमार्फत भेरोसेल खोपको दोस्रो मात्रा लगाउने तयारी सकेको छ ।
उक्त खोपका लागि काठमाडौँ महानगरपालिकामा ३२, चन्द्रागिरिमा १५, तारकेश्वरमा ११, बूढानीलकण्ठमा १३, टोखामा ११, नागार्जुनमा १०, कीर्तिपुरमा १०, दक्षिणकाली, गोकर्णेश्वर, शङ्करापुर र वागेश्वरी मनहरामा ९-९ वटा खोप केन्द्रको व्यवस्था गरिएको छ । सरकारले गत साता ४४ लाख मात्रा भेरोसेल खोप ल्याएको छ ।
उक्त खोप वीर अस्पताल, त्रिवी शिक्षण अस्पताल, निजामती कर्मचारी अस्पताल, नेपाल प्रहरी अस्पताल महाराजगञ्ज, सशस्त्र प्रहरी बल (एपीएफ) अस्पताल बलम्बु , परोपकार प्रसूति तथा स्त्रीरोग अस्पताल र वीरेन्द्र सैनिक अस्पतालमा समेत खोप लगाउन सकिने मन्त्रालयले जनाएको छ ।
वि.सं.२०७८ असोज ३ आइतवार १६:४७ मा प्रकाशित
