काठमाडौं । नेपाल राष्ट्र बैंकले तरलता (लगानीयोग्य रकम) अभाव न्यूनिकरण गर्न रिपोमार्फत बजारमा पैसा पठाएको छ ।
राष्ट्र बैंकले करिब २० दिनको अवधिमा रिपोमार्फत बैंकहरूलाई १ खर्ब रुपैयाँ तरलता दिएको छ । राष्ट्र बैंकका अनुसार भदौ १७ गते २० अर्ब, २४ गते ३० अर्ब, ३१ गते २० अर्ब र असोज ७ गते (आज) ३० अर्ब रुपैयाँसहित १ खर्ब रुपैयाँ तरलता रिपोमार्फत बैंकिङ प्रणालिमा पठाएको छ ।
बैंकमा तरलता अभाव भएसँगै बैंकहरुले मुद्दति निक्षेप तथा बचतको ब्याज बढाएका छन् । बैंकहरुले असोजदेखी लागू हुनेगरी सार्वजनिक गरेको नयाँ ब्याजदर दोहोरो अंकमा रहेको छ ।
जसले बैंकमा निक्षेप बढी उठने बैंकर्सहरुको अपेक्षा रहेको छ । तर त्यसले मात्रै नपुग्ने भन्दै राष्ट्र बैंकले रिपो मार्फत प्रणालीमा पैसा पठाइरहेको छ । बैंकमा पैसाका अभाव भयो भने राष्ट्र बैंकले मौद्रिक उपकरण प्रयोग गरेर पैसा पठाउने र प्रणालीमा बढी पैसा भएको खण्डमा पैसा खिच्ने काम गर्दै आएको छ ।
अझै पनि बैंक तथा वित्तीय संस्थामा करिब २ खर्ब तरलताको अभाव देखिएको बैंकर्सहरुको भनाई छ । पछिल्लो समय बैंकमा कर्जाको माग निकै बढेको छ । बैंक मात्रै नभएर विकास बैंकमा पनि कर्जाको माग बढिरहेको छ । तर निक्षेप संकलन न्यून देखिएको छ । पछिल्लो समय बजेट खर्च नहुँदा पनि बैंकमा लगानीयोग्य रकमको अभाव सृजना भएको जानकारहरुको भनाई छ ।
वि.सं.२०७८ असोज ७ बिहीवार ११:५३ मा प्रकाशित