काठमाडौं । चालु आर्थिक वर्षको दुई महिनामा ४० करोड २२ लाख ५० हजार रुपैयाँको साइकल आयात भएको छ ।
भन्सार विभागको अनुसार भदौ मसान्तसम्म ७२ हजार २९९ वटा साइकल आयात भएको छ । उक्त साइकल बाट राज्यले ७ करोड ५१ लाख ९८ हजार रुपैयाँ राजस्व लिएको छ ।
विभागका अनुसार दुई महिनाको अवधिमा १२ वटा देशबाट उक्त साइकल आयात भएको हो । यो अवधिमा सबैभन्दा बढी साइकल भारतबाट आयात भएको छ । दोस्रो बढी साइकल आयात हुने देश चीन हो । भारतबाट ४५ हजार ३४ वटा साइकल आयात भएको छ । उक्त साइकलको मूल्य २१ करोड ४७ लाख ४ हजार रुपैयाँ रहेको छ । जसबाट राज्यले ३ करोड ९९ लाख ९४ हजार रुपैयाँ राज्यले कर राजस्व उठाएको छ ।
यस्तै चीनबाट १८ करोड १६ लाख ३२ हजार रुपैयाँको २७ हजार ८१ वटा साइकलबाट राज्यले ३ करोड ४१ लाख २३ हजार रुपैयाँ राजस्व पाएको छ ।
विभागका अनुसार इन्डोनेसियाबाट आयात भएको ९ लाख ८१ हजार रुपैयाँको ११० वटा साइकलबाट राज्यले १ लाख ८३ हजार रुपैयाँ राजस्व उठाएको छ । यता कतारबाट नेपालमा ३७ वटा साइकल आयात भएको छ । ३ लाख ३१ हजार रुपैयाँको साइकल आयात हुँदा ४६ हजार रुपैयाँ कर राजस्व संकलन भएको छ ।
नेपालमा कुवेत, यूनाइटेड अबर इमिरेट्स, तान्जेनिया, बहराइन, जर्मनी, म्यानमार, ओमान, यूके, अमेरिकाबाट साइकल आयात भएको छ । उक्त देशबाट भने व्यवसायीक प्रयोजनको लागि भन्दा पनि व्यक्तिगत प्रयोजनको लागि साइकल आयात भएको छ ।
नेपालका शहरी क्षेत्रमा पछिल्लो समयमा साइकल प्रयोग गर्ने प्रचलन निकै बढ्न थालेको छ । काठमाडौं उपत्यकाका साथै उपत्यका बाहिरका ठूला सहरमा पनि साइकलको प्रयोग निकै बढ्न थालेको छ । पछिल्लो समयमा मानिसले साइकललाई बाध्यता भन्दा पनि शोखका रुपमा प्रयोग गर्न थालेका छन् । शहरी क्षेत्रका मानिसहरु शनिबार तथा सार्वजनिक विदाको दिन साइकल यात्रामा निस्कने प्रचलन बढेको छ । पछिल्लो समयमा ‘सम्बन्ध जोडदै देश घुमौं’ भनेर साइकल यात्रा समेत हुन् थालेको छ ।
वि.सं.२०७८ असोज ११ सोमवार १८:१५ मा प्रकाशित