काठमाडौं । निकै समयको गिरावटपछि सेयर बजारमा सुधार दोहोरो अंकको सुधार देखिएको छ ।
बुधबारको कारोबारमा नेप्से मापन गर्ने सूचक ५०.५८ अंकले बढेर परिसूचक २६६५.९४ बिन्दुमा रोकिएको छ ।
२२९ कम्पनीको ९८ लाख ९४ हजार ४७८ कित्ता सेयर ५ अर्ब २ करोड ८५ लाख ५५ हजार ९२ रुपैयाँको सेयर किनबेच भएको छ ।
कारोबारमा सबै समूहको उपसूचकमा बढोत्तरी देखिएको छ । बैंकिङ समूहको २०.२९, विकास बैंक १५०.६८, फाइनान्स १०७.४७, जलविद्युत ११७.३४, जीवन बीमा २१५.३८, माइक्रोफाइनान्स ८८.०१, निर्जीवन बीमा समूहको उपसूचक २५५.६६ अंकले बढेको छ ।
केही समय यता सेयर बजारमा दैनिकजसो भारी अंकको गिरावट आएको छ । यही बीचमा बुधबारको कारोबारमा दोहोरो अंकको बढोत्तरी देखिएको छ । केही समय यता बजारमा आएको गिरावटले निकै त्रसित बनेका लगानीकर्ताहरु एकाएक बजारमा आएको सुधारले हौसिनु भन्दा पनि बजार बुझेर लगानी गर्नुपर्ने जानकारहरुको भनाई छ ।
यस्तो बेला लगानीकर्ताले सुझबुझका साथ लगानी नगर्ने हो भने सोझा लगानीकर्ता फस्ने भन्दै यसमा सबै सजग हुनपर्ने जानकारहरुको भनाई छ । सोझा लगानीकर्ताले बजार बढ्यो भनेर अन्जानमा बजारमा लगानी गर्दा डुब्न सक्ने सम्भावना पनि हुन्छ ।
एक जानकारका अनुसार सोझा लगानीकर्तालाई फसाउन ठूलाले बजार बढाएको पनि हुनसक्ने देखिएको छ । यो दिन बजार बढेपनि कारोबार रकमले अपेक्षा अनुसार साथ दिन सकेको छैन ।
वि.सं.२०७८ असोज १३ बुधवार १५:३६ मा प्रकाशित