काठमाडौं । चालु आर्थिक वर्ष २०७८/७९ को भदौ मसान्तसम्म १ अर्ब बढीको स्याउ आयात भएको छ ।
नेपालमा नै उत्पादन भएको स्याउ ढुवानी र बजार सुनिश्चित हुन नसक्दा आयात बढेको हो । भन्सार विभागले हालै सार्वजनिक गरेको तथ्याङ्क अनुसार भदौ मसान्तसम्म १ अर्ब २७ करोड ९७ लाख ६० हजारज रुपैयाँ बराबरको ताजा स्याउ आयात भएको हो ।
नेपालमा छिमेकी दुई मुलुक भारत र चीन, टर्कीबाट स्याउ आयात हुने गरेको विभागले जनाएको छ । नेपाली अर्गानिक स्याउको ब्राण्डिङको अभावमा विदेशी स्याउ आयात बढेको बताइएको छ ।
चालु आवको भदौ महिनामा १६ हजार ७२ टन बढी स्याउ आयात भएको हो । नेपाली बजारमा चिनियाँ स्याउको बर्चस्व देखिएको छ ।
चालु आवको भदौ महिनासम्म चीनबाट ८६ करोड ३९ लाख ८२ हजार रुपैयाँ बराबरको स्याउ नेपाल भित्रिएको हो । उक्त अवधिमा चीनबाट ९ हजार ६७४ टन बढी स्याउ आयात भएको विभागले जनाएको छ ।
यस्तै, भारतबाट ४१ करोड ४३ लाख ९९ हजार रुपैयाँ बराबरको ताजा स्याउ आयात भएको देखिएको छ । उक्त देशबाट चालु आवको भदौ महिनासम्ममा ६ हजार ३७६ टन बढी स्याउ आयात भएको विभागले जनाएको छ ।
त्यसैगरि टर्कीबाट भने १३ लाख ८० हजार रुपैयाँ बराबरको २० टन बढी स्याउ आयात भएको छ । यी तीनै देशबाट स्याउ आयात हुँदा १२ करोड ३३ लाख ४० हजार रुपैयाँ राजस्व प्राप्त गरेको हो ।
नेपालमा उत्पादन हुने गरेको स्याउनको राम्रो ग्रेडिङ हुन नसक्नु र ढुवानीमा हुने कठिनाइका कारण पनि नेपाली उत्पादनले बजार नपाउने, किसानको लगानी नउठ्ने तर आयात भने प्रशस्त हुने गरेको छ ।
नेपालमै उत्पादित स्याउको बजार व्यवस्थापनमा ध्यान दिन सकेमा स्वदेशमै रोजगारी सृजना, आयआर्जन वृद्धि र आयात प्रतिस्थापन गर्न सकिने जानकारहरुको भनाई छ ।
यसले अर्थतन्त्रमा समेत धेरै ठेवा पुग्ने देखिन्छ । नेपाली उत्पादनलाई पूर्ण प्रयोगमा ल्याउन नसक्दा स्याउ आयातकै नाममा नेपालबाट वर्षेनी अर्बौ रकम विदेशीने गरेको छ । नेपालमा मुस्ताङ, जुम्ला लगायतका जिल्लामा स्याउ उत्पादन हुने गरेको छ ।
वि.सं.२०७८ असोज १४ बिहीवार १३:४१ मा प्रकाशित