काठमाडौं । वाणिज्य बैंकले बढाएको ब्याजदरको प्रभाव बैंकको निक्षेप संकलनमा देखिन थालेको छ ।
असोज दोस्रो सातासम्म वाणिज्य बैंकमा कर्जाको माग अपेक्षा भन्दा धेरै बढ्दा निक्षेप संकलन ज्यादै कमी रहेको थियो । बैंकहरुले प्रणालीमा लगानीयोग्य रकमको निकै अभाव हुन थालेपछि निक्षेप तथा बचतको ब्याज बढाएका थिए । जसले गर्दा अहिले बैंकहरुमा निक्षेप संकलन र कर्जाको माग बढेको छ ।
नेपाल बैंकर्स संघका अनुसार असोज १८ सम्ममा वाणिज्य बैंकमा निक्षेप संकलन ३८ अर्ब र कर्जाको माग ३९ अर्ब रुपैयाँले बढेको छ । गत साता बैंकका कर्जाको माग ३१ अर्ब र निक्षेप संकलन जम्मा ८ अर्ब रुपैयाँले बढेको थियो । एक साताको अवधिमा बैंकको कर्जा र निक्षेप दुवै बढेको देखिएको छ ।
संघका अनुसार असोज १५ गतेसम्ममा बैंकमा ४२ खर्ब १८ अर्ब निक्षेप संकलन भएको छ । असोज ८ गतेसम्म निक्षेप ४१ खर्ब ८० अर्ब रुपैयाँ निक्षेप संकलन गरेका थिए ।
यस्तै असोज १५ सम्म आईपुग्दा बैंकहरुमा कर्जाको माग ३९ खर्ब ४२ अर्ब रुपैयाँ रहेको छ । यो साता मात्रै ३९ अर्ब रुपैयाँले बढेको छ । गत साता कर्जाको माग बैंकमा ३९ खर्ब ३ अर्ब रुपैयाँ रहेको थियो ।
कोरोना महामारी न्यून भएसँगै बैंकमा कर्जा लिनेको संख्या निकै बढेको छ । कर्जाको माग बढेको र निक्षेप नभएपछि बैंकहरुले निक्षेप संकलनको लागि ब्याजदरलाई हतियार बनाएका थिए । जुन अहिले निक्षेप संकलनको लाग बलियो हतियार साबित भएको छ ।
वि.सं.२०७८ असोज १८ सोमवार १७:३१ मा प्रकाशित