काठमाडौं । सरकारले तोकेको समयमा मल ल्याउन नसकेको मुक्तिनाथ कृषि कम्पनीले साधारण सेयर (आइपीओ) जारी गर्ने भएको छ ।
गत आर्थिक वर्ष २०७७–७८ मा उक्त कम्पनीले २५ हजार टन युरिया र २५ हजार टन डीएपी आपूर्ति गर्ने ठेक्का पाएको थियो । तर, उक्त कम्पनीले समयमा नै मल आयात गर्न नसकेपछि कृषि सामग्री कम्पनीले सार्वजनिक खरिद अनुगमन कार्यालयलाई पत्र लेख्दै कालोसूचीमा राख्न सिफारिस गरेको थियो ।
त्यही अनुसार नै उक्त कार्यालयले दुई वर्षका लागि कालोसूचीमा राखेको छ । कालो सूचीमा राखेको समय नसकिँदै कम्पनीले आइपीओ निष्काशनको तयारी थालेको छ । कालो सूचीमा रहेको मुक्तिनाथ कृषि कम्पनीलाई उक्त अवधिदेखी दुई वर्षको लागि सरकारी ठेक्का रोक लगाइएको छ । तर आइपीओ भने ल्याउने तयारीमा जुटेको छ ।
तत्कालित समयमा मुक्तिनाथ कृषि कम्पनीले युरिया प्रतिटन ३१७.१७ डलर र डीएपी ३९८.७९ डलर प्रतिटनका दरले ल्याउन टेन्डर पारेको थियो । मल ल्याउन नसकेपछि करिब ११ करोड रुपैयाँ धरौटी नै जफात समेत भएको थियो ।
त्यही कम्पनीले सर्वसाधारणका लागि प्रतिकित्ता १०० रूपैयाँका दरले ४ करोड रुपैयाँको ४ लाख कित्ता आइपीओ निष्कासन गर्न भन्दै निष्कासन तथा बिक्री प्रबन्धकमा मेगा क्यापिटल मार्केट्स लिमिटेडलाई नियुक्त गरेको छ ।
उक्त सम्झौतापत्रमा कम्पनीका कार्यकारी अध्यक्ष भरतराज ढकाल र मेगा क्यापिटल मार्केट्सका प्रमुख कार्यकारी अधिकृत सवीर बादे श्रेष्ठले हस्ताक्षर गर्नु भएको छ ।
वि.सं.२०७८ असोज २१ बिहीवार १७:३४ मा प्रकाशित
