काठमाडौं । अघिल्लो साताको तुलनामा गत सातामा वाणिज्य बैंकमा निक्षेप संकलनमा कुनै घटबढ नभएपनि कर्जाको माग भने बढेको छ ।
असोज १५ गतेसम्म वाणिज्य बैंकमा ३८ अर्ब निक्षेप संकलन हुँदा कर्जाको माग ३९ अर्ब रहेको थियो । उक्त साता निक्षेप संकलन र कर्जा मागको अन्तर १ अर्ब मात्रै रहेको थियो । तर यो साता अर्थात असोज २२ गतेसम्म आइपुग्दा निक्षेप संकलन ३८ अर्ब र कर्जाको माग ४१ अर्ब रुपैयाँले बढेको छ ।
बैंकर्स संघका अनुसार असोज २२ गतेसम्म आईपुग्दा बैंकको निक्षेप संकलन ४२ खर्ब ५५ अर्ब ३४ करोड रुपैयाँ पुगेको छ । असोज ८ गते ४१ खर्ब ८० अर्ब रुपैयाँ रहेको निक्षेप संकलन १५ गतेसम्म आईपुग्दा ४२ खर्ब १८ अर्ब रुपैयाँ रहेको थियो ।
यस्तै कर्जाको माग ४१ अर्ब रुपैयाँले बढेर ३९ खर्ब ८३ अर्ब २२ करोड रुपैयाँ पुगेको छ । असोज ८ गते ३९ खर्ब ३ अर्ब रुपैयाँ रहेकोमा १५ गतेसम्म आईपुग्दा ३९ खर्ब ४२ अर्ब रुपैयाँ पुगेको थियो ।
बैंकको लगानीयोग्य रकमको अभाव भएपछि बैंकहरुले निक्षेप उठाउन ब्याजदरलाई हतियार बनाएका थिए । त्यसले पनि प्रभावकारी रुपमा काम गर्न सकेको देखिदैन । तथापी सरकारले पुँजीगत खर्च गर्न नसक्दा बैंकको निक्षेप कम भएको जानकारहरुको भनाई छ ।
वि.सं.२०७८ असोज २५ सोमवार १७:१४ मा प्रकाशित