काठमाडौं । यस बर्ष दसैंका मुख्य दिनहरुमा फोहोर नियमित संकलन गरिने भएको छ ।
कर्मचारीलाई आलोपालो खटाएर, साँझ वा बिहानको समयमा फोहोर उठाउने वातावरण व्यवस्थापन विभागले योजना बनाएको छ । विभागका प्रमुख हरिकुमार श्रेष्ठका अनुसार संकलन, ढुवानी र अन्तिम व्यवस्थापनका लागि जनशक्ति खटाइएको छ ।
‘यो स्वच्छ पर्व मनाउने प्रयास हो । यसका लागि हरेक फोहोर उत्पादकले पनि सहयोग गर्नुपर्छ’ श्रेष्ठले भन्नुभयो ‘यस अवधिमा उद्योग÷व्यवसाय÷कार्यालय बन्द नै रहन्छन् । धेरै मानिस काठमाडौं बाहिर जाने भएकोले मात्रा त्यसै पनि घट्छ । काठमाडौंमा हुनेले कम फोहोर निकालिदिए पुग्छ । अहिले देवी शक्तिपीठसहित मानिसहरुको धेरै चहलपहल धेरै हुने ठाउँ बजार र मठ-मन्दिरमा सरसफाइ गर्ने, चोक, गल्ली र खुल्ला ठाउँमा पानी छर्किने, बढार्ने लगायतका काम भइरहेका छन् ।
महानगरको फोहोर संकलनमा साझेदारिता गर्दै आएका निजी तथा गैर सरकारी संघ संस्थाका प्रतिनिधिहरु ल्याण्डफिल साइट सञ्चालन भए आफूहरुलाई नियमित काम गर्न कठिन नहुने बताउँछन् । वातावरण संरक्षण गैसस महासंघका अध्यक्ष टीकाराम दाहालका अनुसार फोहोर उत्पादन गर्नेहरुले पनि जिम्मेवार भएर फोहोर व्यवस्थापनमा सहयोगी बन्नुपर्छ ।
दसैँ अवधिमध्ये फुलपाती र अष्टमीका दिन धेरै फोहोर उत्पादन हुन्छ । सहरमा उत्पादन भएको फोहोर महानगरले टेकु ट्रान्सफर स्टेशनमा जम्मा गरेर संकलित फोहोर सिसडोल ल्याण्डफिल साईटमा अन्तिम व्यवस्थापनको काम गर्दै आएको छ । उता निजी तथा गैरसरकारी संघसंस्थाले भने सहरका बिभिन्न ठाउँमा जम्मा गरेर ढुवानीको प्रबन्ध गर्दै आएका छन् ।
वि.सं.२०७८ असोज २६ मंगलवार १३:५८ मा प्रकाशित