काठमाडौं । सञ्चालनमा रहेका माइक्रोफाइनान्स मध्ये दसैं अगाडि नै १८ वटाले लगानीकर्तालाई लाभांशको घोषणा गरेका छन् । केही कम्पनीको लाभांशले लगानीकर्तालाई उत्साहित बनाएको छ भने केहीको लाभांशले निरास पनि बनाएको छ ।
अहिलेसम्म लाभांश घोषणा गरेका १८ वटा माइक्रोफाइनान्स कम्पनीमा सबैभन्दा बढी लाभांश सबैभन्दा बढी महिला लघुवित्त वित्तीय संस्थाले ५० प्रतिशत लाभांश दिने प्रस्ताव गरेको छ । जसमा ४५ प्रतिशत बोनस र नगद ५ प्रतिशत रहेको छ । महिलापछि बढी लाभांश दिने कम्पनीमा स्वाभिमान लघुवित्त वित्तीय संस्था रहेको छ । संस्थाले ३४ प्रतिशत लाभांश दिने भएको छ । जसमा बोनस ३२.३ र नगद १.७ प्रतिशत दिने भएको छ ।
यता सबैको लघुवित्त वित्तीय संस्थाले ३२.६८ प्रतिशत लाभांश दिने भएको छ । जसमा बोनस ३१.०५ प्रतिशत र १.६३ प्रतिशत नगद लाभांश दिने भएको छ ।
संस्थाहरुले प्रकाशित गरेको सूचना अनुसार २० प्रतिशत भन्दा बढी लाभांश दिने कम्पनीहरुमा १० वटा रहेका छन् । स्वाभिमान, ग्लोबल आईएमई, मेरो माइक्रोफाइनान्स, आशा लघुवित्त, लक्ष्मी लघुवित्त, सिभिल लघुवित्त, साधना लघुवित्त, स्वरोजगार लघुवित्त, डिप्रोक्स लघुवित्त, मिर्मिरे लघुवित्त र नेरुडे लघुवित्त वित्तीय संस्थाले २० देखी ३० प्रतिशतको बीचमा लाभांश दिने भएका छन् ।
२० प्रतिशत भन्दा कम लाभांश दिनेमा गुँरास लघुवित्त वित्तीय संस्था, फस्ट माइक्रोफाइनान्स, आरएसडिसी लघुवित्त वित्तीय संस्था र एनआईसी एशिया लघुवित्त वित्तीय संस्था रहेको छ ।
एनआईसी एशिया लघुवित्त वित्तीय संस्थाले ५.४१ प्रतिशत नगद लाभांश मात्रै दिने प्रस्ताव गरेको छ । आईएनआईसीले बोनस भने नदिने भएको छ ।
यी कम्पनीहरुले लाभांश घोषणा गरेपनि नेपाल राष्ट्र बैंकले स्वीकृत गरेर सम्बन्धित कम्पनीको साधारणसभाले पारित गरेपछि मात्रै सेयरधनीहरुले उक्त लाभांश पाउने छन् ।
वि.सं.२०७८ असोज २६ मंगलवार १५:०७ मा प्रकाशित