काठमाडौं । चालु आर्थिक वर्षको दुई महिनामा विप्रेषण आप्रवाह ६.३ प्रतिशतले घटेको छ । विप्रेषण आप्रवाह ६.३ प्रतिशतले घटेर १ खर्ब ५५ अर्ब ३७ करोड कायम भएको छ ।
अघिल्लो वर्षको सोही अवधिमा विप्रेषण आप्रवाह ८.१ प्रतिशतले बढेको थियो । अमेरिकी डलरमा विप्रेषण आप्रवाह ५.८ प्रतिशतले कमी आई १ अर्ब ३१ करोड रहेको छ । अघिल्लो वर्ष यस्तो आप्रवाह २.६ प्रतिशतले बढेको थियो ।
कोरोना महामारी न्यून हुँदै गएपछि आयात निर्यात बढेको छ । जसको कारण हुण्डीको कारोबार बढेको छ । पछिल्लो समयमा हुण्डीको कारोबारीलाई प्रहरीले नियन्त्रणमा लिने क्रम बढेको छ । केही दिन अघिमात्रै प्रहरीले भक्तपुरबाट ५० लाख सहित हुण्डीको कारोबारीलाई नियन्त्रणमा लिएको थियो ।
दुई महिनाको अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या उल्लेख्य रुपमा वृद्धि भई ३८ हजार ४९२ पुगेको छ ।
अघिल्लो वर्षको सोही अवधिमा यस्तो संख्या ९९.२ प्रतिशतले घटेको थियो । त्यसैगरी, वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा उल्लेख्य रुपमा वृद्धि भई २२ हजार ९७६ जना पुगेको छ ।
अघिल्लो वर्षको सोही अवधिमा यस्तो संख्या ८६.५ प्रतिशतले घटेको थियो । यो अवधिमा खुद ट्रान्सफर ६.४ प्रतिशतले कमी आई १ खर्ब ७१ अर्ब ९२ करोड कायम भएको छ । अघिल्लो वर्षको सोही अवधिमा यस्तो ट्रान्सफर ४.४ प्रतिशतले बढेको थियो ।
वि.सं.२०७८ कात्तिक ८ सोमवार १७:५८ मा प्रकाशित