काठमाडौं । चालु आर्थिक वर्षको दुई महिनामा संघीय सरकारले ८९ अर्ब ९४ करोड रुपैयाँ खर्च गरेको छ ।
नेपाल राष्ट्र बैंकले सार्वजनिक गरेको देशको वर्तामान आर्थिक तथा वित्तीय स्थितीको तथ्याङले यस्तो देखाएको हो ।
अर्थ मन्त्रालय (महालेखा नियन्त्रक कार्यालय) का अनुसार २०७८ भदौ मसान्तसम्ममा चालु खर्च ५८ अर्ब ५९ करोड रुपैयाँ, पुँजीगत खर्च २ अर्ब ६१ करोड र वित्तीय व्यवस्था अन्तर्गतको खर्च २८ अर्ब ७३ करोड रुपैयाँ रहेको छ ।
उक्त अवधिमा सरकारको कर राजस्व १४८ अर्ब ५६ करोड रुपैयाँ र गैर कर राजस्व २० अर्ब २ करोड रुपैयाँ गरी कुल राजस्व १६८ अर्ब ५८ करोड (प्रदेश सरकार तथा स्थानीय तहमा बाँडफाँट हुने रकमसमेत) परिचालन भएको छ ।
राष्ट्र बैंकको तथ्याङ्क अनुसार प्रदेश सरकारले आर्थिक वर्ष २०७८/७९ को भदौ महिनासम्ममा प्रदेश सरकारको स्रोत प्राप्ति २० अर्ब ४३ करोड रुपैयाँ रहेको छ ।
यसमध्ये संघीय सरकारले प्रदेश सरकारलाई अनुदान र संघीय विभाज्य कोषबाट बाँडफाँट हुने राजस्वसमेत गरी ११ अर्ब ४३ करोड रुपैयाँ हस्तान्तरण गरेको छ ।
उक्त अवधिमा प्रदेश सरकारहरुले राजस्व र अन्य स्रोतबाट ९ अर्ब रुपैयाँ परिचालन गरेका छन्। यसैगरी, प्रदेश सरकारहरुको खर्च २ अर्ब ६४ करोड रुपैयाँ रहेको छ ।
वि.सं.२०७८ कात्तिक ८ सोमवार १८:१९ मा प्रकाशित