काठमाडौं । नेपाल सुन आयात ह्वात्तै बढेको छ । एक महिनाको अवधिमा सुन आयात ३२.४८ प्रतिशतले वृद्धि भएको हो ।
चालु आर्थिक वर्ष २०७८/७९ को तीन महिनामा ११ अर्ब बढीको सुन आयात भएको छ । भन्सार विभागले हालै सार्वजनिक गरेको तथ्याङ्कले यस्तो देखाएको हो ।
असोज मसान्तसम्म नेपालमा ११ अर्ब ७ करोड २८ लाख ३५ हजार रुपैयाँ बराबरको सुन आयात भएको छ । भन्सार विभागका अनुसार उक्त अवधिमा १ हजार ६२० केजी बढी सुन नेपाल भित्रिएको हो ।
सुन टर्की र युएईबाट सुन आयात भएको हो । सुन आयातबाट सरकारले १ अर्ब ३७ करोड ७४ लाख २७ हजार रुपैयाँ राजश्व प्राप्त गरेको छ ।
विभागका अनुसार चालु आवको भदौ मसान्तसम्म ८ अर्ब ३५ करोड ७७ लाख ६७ हजार रुपैयाँ बराबरको सुन आयात भएको थियो । भदौ मसान्तसम्म १ हजार २१५ केजी सुन आयात भएको थियो ।
चालु आवको तीन महिनाको अवधिमा सबैभन्दा बढी सुन यूएईबाट आयात भएको छ । उक्त देशबाट नेपालमा ७ अर्ब ९५ करोड ३२ लाख २८ हजार रुपैयाँ बराबरको सुन आयात भएको हो ।
असोज मसान्तसम्ममा यूएईबाट नेपालमा १ हजार १६३ केजी सुन भित्रिएको विभागले जनाएको छ । भदौ मसान्तसम्म उक्त देशबाट ५ अर्ब ९२ करोड ३७ लाख ४० हजार रुपैयाँ बराबरको ८६० केजी बढी सुन आयात भएको थियो ।
यस्तै, टर्कीबाट ३ अर्ब ११ करोड ९६ लाख ७ हजार रुपैयाँ बराबरको सुन नेपाल भित्रिएको तथ्याङ्कमा उल्लेख छ ।विभागका अनुसार उक्त मुलुकबाट चालु आवको तीन महिनामा ४५७ केजी सुन आयात भएको हो ।
चालु आवको दुई महिना अर्थात भदौ मसान्तसम्म टर्कीबाट २ अर्ब ४३ करोड ४० लाख २७ हजार रुपैयाँ बराबरको ३५४ केजी बढी सुन नेपाल भित्रिएको थियो ।
वि.सं.२०७८ कात्तिक १० बुधवार १५:०६ मा प्रकाशित
