काठमाडौं । बुधबार नबिल बैंकमा लगानीकर्ता झुम्मिएका छन् । उक्त दिन बैंकमा लगानीकर्ता झुम्मिँदा सर्वाधिक कारोबार भएको छ ।
आज बैंकको १ अर्ब १७ करोड ९७ लाख ८६ हजार रुपैयाँ बराबरको सेयर कारोबार भएको छ ।
नेपाल स्टक एक्सचेञ्ज (नेप्से)का अनुसार आज बैंकमा ७ लाख ५ हजार ४३० कित्ता सेयर खरिदबिक्री भएको हो ।
बैंकले लगानीकर्तालाई ३८ प्रतिशत लाभांश घोषणा गरेको छ । जसको प्रभाव सेयर मूल्यमा पनि देखिएको छ । उक्त दिन बैंकको सेयर मूल्य २.८० प्रतिशतले वृद्धि भएको हो ।
आज बैंकको सेयर मूल्य प्रतिकित्ता ४५ रुपैयाँले वृद्धि भई १ हजार ६५३ रुपैयाँ कायम भएको छ ।
बैंकले गत आर्थिक वर्ष २०७७/७८ को सञ्चित मुनाफाबाट हाल कायम चुक्तापूँजीको आधारमा ३३.६ प्रतिशत बोनस सेयर र कर प्रयोजनका लागि समेत ४.४ प्रतिशत नगद लाभांश वितरणको प्रस्ताव गरेको हो ।
प्रस्तावित उक्त लाभांश अब नेपाल राष्ट्र बैंकको स्वीकृति पश्चात बैंकको आगामी साधारण सभाले पारित गरेपछि वितरण हुनेछ ।
वि.सं.२०७८ कात्तिक १७ बुधवार १५:४६ मा प्रकाशित