बसन्त रुपाखेती
काठमाडौं । संचालनमा रहेकामध्ये विभिन्न ५ विकास बैंकले लाभांश घोषणा गरेका छन् । विकास बैंकहरुले आर्थिक वर्ष २०७७/७८ मुनाफबाट लाभांश घोषणा गरेका हुन् ।
हालसम्म कामना सेवा विकास बैंक, लुम्बिनी, मुक्तिनाथ, सांग्रिला डेभलपमेन्ट र शाइन रेसुङ्गा डेभलपमेन्ट बैंकले लाभांश घोषणा गरेका छन् ।
जसमध्ये सबैभन्दा बढी लाभांश कामना सेवा विकास बैंकले दिने भएको छ । बैंकले १८.५ प्रतिशत बोनस सेयर र कर प्रयोजनका लागि ०.९७ प्रतिशत नगद गरि कुल १९.४७ प्रतिशत लाभांश दिने घोषणा गरेको छ ।
यी ५ वटा विकास बैंकमध्ये सबैभन्दा कम सांग्रिला डेभलपमेन्ट बैंकको देखिएको छ । बैंकले सेयर लगानीकर्ताहरुलाई १० प्रतिशत बोनस र ०.५३ प्रतिशत नगद गरि कुल १०.५३ प्रतिशत लाभांश दिने भएको हो ।
यस्तै, मुक्तिनाथ विकास बैंकले आर्थिक वर्ष २०७७/७८ को मुनाफबाट सेयरधनीहरुलाई १८.५१ प्रतिशत लाभांश दिने भएको छ । जसमध्ये १७.५८ प्रतिशत बोनस र ०.९३ प्रतिशत नगद लाभांश रहेको छ ।
यस्तै, लुम्बिनी विकास बैंकले १३.७१ प्रतिशत लाभांश दिने भएको छ । बैंकले सेयरधनीहरुलाई १० प्रतिशत बोनस सेयर र ३.७१ प्रतिशत नगद लाभांश दिने भएको हो ।
यता, शाइन रेसुङ्गा डेभलपमेन्ट बैंकले भने साढे ११ प्रतिशत लाभांश दिने घोषणा गरेको छ ।
बैंकले आव २०७७/७८ मुनाफबाट सेयरधनीहरुलाई १०.९३ प्रतिशत बोनस सेयर र ०.५७ प्रतिशत नगद लाभांश दिने भएको हो ।
कुनको बोनस कति ?
वि.सं.२०७८ कात्तिक २४ बुधवार १३:३९ मा प्रकाशित
