काठमाडौं । तिहार लगत्तै थप चार वाणिज्य बैंकहरुले लाभांश घोषणा गरेका छन् । बैंकहरुले गत आर्थिक वर्ष २०७७/७८ को लाभांश घोषणा गरेका हुन् ।
हालसम्म २० वाणिज्य बैंकहरुले लाभांश घोषणा गरेका छन् । जसमध्ये ४ बैंकहरुले तिहारपछि मात्र लाभांश घोषणा गरेका हुन् । यस अघि १६ बैंकहरुले लाभांश घोषणा गरिसकेका छन् ।
तिहार लगत्तै लाभांश घोषणा गर्नेमा मेगा बैंक, प्रभु, प्राइम कमर्सियल र सनराइज बैंकले लाभांश प्रस्ताव गरेका हुन् ।
जसमध्ये मेगा बैंकले १२.०७ प्रतिशत बोनस सेयर दिने भएको छ । बैंकले हाल कायम चुक्ता पुँजी १४ अर्ब ६५ करोड रुपैयाँको १२.०७ प्रतिशतले हुन आउने १ अर्ब ७६ करोड रुपैयाँ बराबरको बोनस सेयर दिने भएको हो ।
यस्तै, प्रभ बैंकले १२.६३ प्रतिशत लाभांश प्रस्ताव गरेको छ । बैंकले गत आर्थिक वर्ष २०७७/७८ को मुनाफाबाट १२ प्रतिशत बोनस सेयर र कर प्रयोजनका लागि ०.६३ प्रतिशत नगद लाभांश वितरण गर्ने भएको हो ।
त्यसैगरि सनसाइज बैंकले भने ७ प्रतिशत लाभांश प्रस्ताव गरेको छ । बैंकले आर्थिक वर्ष २०७७/७८ को मुनाफाबाट सेयरधनीहरुलाई ६.६५ प्रतिशत बोनस सेयर र कर प्रयोजनका लागि ०.३५ प्रतिशत नगद लाभांश वितरण गर्ने निर्णय गरेको छ ।
यता, प्राइम कमर्सियल बैंकले १६.६३ प्रतिशत लाभांश प्रस्ताव गरेको छ । बैंकले गत आर्थिक वर्ष २०७७/७८ को सञ्चित मुनाफाबाट हाल कायम चुक्तापूँजीको आधारमा १६ प्रतिशत बोनस सेयर र ०.६३ प्रतिशत कर प्रयोजनसहित नगद लाभांश वितरण गर्ने प्रस्ताव गरेको हो ।
यी चारै वटा बैंकहरुद्वारा प्रस्तावित उक्त लाभांश नेपाल राष्ट्र बैंकबाट स्वीकृत प्राप्त भई आगामी वार्षिक साधारणसभाले पारित गरेपश्चात वितरण हुनेछ ।
वि.सं.२०७८ कात्तिक २४ बुधवार १६:५२ मा प्रकाशित
