बिक्रम सुनार
काठमाडौं । चालु आर्थिक वर्ष २०७८/७९ को पहिलो त्रैमासमा जलविद्युत कम्पनीहरुले साढे ६५ करोड बढी नाफा गरेका छन् ।
संचालनमा रहेकामध्ये १० कम्पनीहरुले सार्वजनिक गरेको चालु आवको असोज मसान्तसम्मको वित्तीय विवरणले यस्तो देखाएको हो ।
उक्त अवधिमा ती कम्पनीहरुले ५६ करोड ५४ लाख ४६ हजार रुपैयाँ नाफा गरेका हुन् । कम्पनीहरुको नाफा गत वर्षको असोज मसान्तको तुलनामा ८२.६४ प्रतिशतले बढी हो । गत वर्षको सोही अवधिमा कम्पनीहरुको नाफा ३० करोड ९५ लाख ९१ हजार रुपैयाँ मात्रै रहेको थियो ।
वित्तीय विवरण सार्वजनिक गरेको १० जलविद्युत कम्पनीमध्ये २ वटा भने नोक्सानीमा देखिएका छन् । जसमध्ये शिवश्री हाइड्रोपावर १० करोड ३३ लाख ३० हजार रुपैयाँ र घलेम्दी हाइड्रो २ करोड १७ लाख ३९ हजार रुपैयाँ ऋणात्मक देखिएको छ । घलेम्दी हाइड्रो गत वर्षको सोही अवधिको तलुनामा भने नोक्सानी घटाएको छ । कम्पनीले गत वर्षको असोज मसान्तमा ३ करोड २ लाख ६४ हजार रुपैयाँ नोक्सानीमा रहेको थियो ।
पहिलो त्रैमासमा सबैभन्दा बढी नाफा माउन्टेन इनर्जी नेपालको रहेको छ । कम्पनीले चालु आवको असोज मसान्तसम्ममा २९ करोड ३५ लाख ८ हजार रुपैयाँ नाफ गरेको छ । जुन गत वर्षको सोही अवधिको तुलनामा ७८५.८२ प्रतिशतले बढी हो । गत वर्षको उक्त अवधिका कम्पनीको नाफा ३ करोड ३१ लाख ३४ हजार रुपैयाँ रहेको थियो ।
यस्तै, धेरै नाफा कमाउने दोस्रो स्थानमा रहेको अरुण कावेली पावरले यस वर्षको पहिलो त्रैमासमा १३ करोड ५३ लाख रुपैयाँ कमाएको छ । कम्पनीको यो नाफा गत वर्षको सोही अवधिको तुलनामा १९.२३ प्रतिशतले बढी हो । गत वर्षको असोज मसान्तसम्म कम्पनीले ११ करोड ३५ लाख ४४ हजार रुपैयाँ नाफा कमाएको थियो ।
उक्त अवधिका सबैभन्दा कम नाफा कमाउने दिव्यश्वरी हाइड्रोपावरले २९ लाख ३७ हजार रुपैयाँ कमाएको छ । यद्यपि, गत वर्षको पहिलो त्रैमासमा भने कम्पनी ५१ लाख ४१ हजार रुपैयाँ नोक्सानीमा रहेको थियो । यसका आधारमा भने कम्पनीको नाफामा उल्लेखीय सुधार नै मान्नुपर्दछ ।
यस्तै, उक्त अवधिमा पाँचथर पावरले १० करोड ३१ लाख ३९ हजार रुपैयाँ कमाएको छ । कम्पनीको नाफा गत वर्षको असोज मसान्तको तुलनामा ४०.२० प्रतिशतले बढी हो । कम्पनीले गत वर्षको सोही अवधिमा ७ करोड ३५ लाख ६१ हजार रुपैयाँ नाफा कमाएको थियो ।
त्यसैगरि उक्त अवधिमा बुटवल पावरले ७ करोड ५८ लाख ९ हजार, रुरु जलविद्युत कम्पनीले ३ करोड ३३ लाख ३५ हजार, आँखु खोला जलविद्युत कम्पनीले २ करोड ३० लाख २० हजार र यूनियन हाइड्रोपावर कम्पनीले १ करोड ३३ लाख ८७ हजार रुपैयाँ नाफा कमाएका छन् ।
हेर्नुहोस, कुनको कति ?
वि.सं.२०७८ कात्तिक २८ आइतवार १७:३२ मा प्रकाशित