काठमाडौं । नेपाल टेलिकमले चालु आर्थिक वर्ष २०७८/७९ को पहिलो त्रैमासिक वित्तीय विवरण मंगलबार सार्वजनिक गरेको छ ।
उक्त अवधिमा कम्पनीले २ अर्ब २५ करोड ९९ लाख ४ हजार रुपैयाँ खुद नाफा कमाएको छ । जुन गत वर्षको सोही अवधिको तुलनामा ४८.९०प्रतिशतले बढी हो ।
गत वर्षको असोज मसान्तममा कम्पनीले १ अर्ब ५१ करोड ७७ लाख ६९ हजार रुपैयाँ नाफा गरेको थियो ।
चालु आवको असोज मसान्तमा कम्पनीले १० अर्ब ९५ करोड २३ लाख ४६ हजार रुपैयाँ कुल आम्दानी गरेको छ । उक्त अवधिमा कम्पनीको कुल आम्दानी ८.३९ प्रतिशतले बढेको हो । गत वर्षको १० अर्ब १० करोड ४४ लाख ७५ हजार रुपैयाँ आम्दानी गरेको थियो ।
हाल कम्पनीको चुक्ता पुँजी १५ अर्ब रुपैयाँ रहेको छ । कम्पनीले जगेडा तथा कोषमा ८३ अर्ब ८२ करोड १९ लाख ९९ हजार रुपैयाँ राखेको छ ।
कम्पनीको प्रतिसेयर आम्दानी ६० रुपैयाँ २६ पैसा र प्रतिसेयर नेटवर्थ ६५८ रुपैयाँ ८१ पैसा रहेको छ ।
वि.सं.२०७८ कात्तिक ३० मंगलवार १२:५५ मा प्रकाशित