काठमाडौ । संयुक्त राष्ट्रसंघको महासभाले नेपाललाई विकासशील राष्ट्रमा स्तरोन्नति गर्ने प्रस्तावलाई अनुमोदन गरेको छ । संयुक्त राष्ट्रसंघको आर्थिक तथा सामाजिक परिषद्ले महासभामा आगामी सन् २०२६ सम्ममा अल्पविकसित राष्ट्रबाट मध्यमस्तरको विकासशील राष्ट्रमा स्तरोन्नति गर्नेसम्बन्धी प्रस्ताव पेश गरेको थियो । संयुक्त राष्ट्रसंघको महासभाले सोमबार सो प्रस्ताव पारित गरेको हो ।
नेपालले आगामी पाँच वर्षभित्र अर्थतन्त्रको संरचनागत परिवर्तनका लागि आफ्ना तर्फबाट सम्पूर्ण प्रक्रिया पूरा गर्न प्रतिबद्ध रहेको जनाएको छ । नेपालले विकासशील राष्ट्र भएपछि थपिनसक्ने चुनौतिलाई सम्बोधन गर्न समेत नेपालले आग्रह गरेको संयुक्त राष्ट्रसंघ नेपाली स्थायी नियोगले जानकारी दिएको छ । नियोगका अनुसार चुनौतिलाई सम्बोधन गर्नका लागि नेपालले विकास साझेदार संस्थाहरुसँग छलफल गरेर एउटा निर्णयमा पुग्ने छ ।
नेपालले यसअघि दुई पटक विकासशी राष्ट्रमा स्तारोन्नति हुने मौका गुमाइसकेको छ । सन् २०१५ र २०१८ मा पनि नेपालले स्तरोन्नतिको मापदण्ड पूरा गरेको थियो तर तत्कालीन अवस्थामा भूकम्पका कारणले अर्थतन्त्रले गम्भीर चुनौतीको सामना गर्नुपरेको भन्दै यो प्रस्तावसम्बन्धी कार्यलाई नेपालकै आग्रहमा पछि सारिएको थियो । राष्ट्रसंघमा सन् १९७१ मा सुचिकृत भएको नेपालले ५० बर्षपछि आफूलाई विकासशील राष्ट्रमा सुचिकृत गराउन सफल भएको छ ।
वि.सं.२०७८ मंसिर ९ बिहीवार १६:२३ मा प्रकाशित
