काठमाडौ । नेपाल राष्ट्र बैंकले सेयर धितो कर्जामा लगाएको सिमामा कु्नै हेरफेर गरेन । शुक्रबार मौद्रिक नीतिको त्रैमासिक समिक्षा गरेको राष्ट्र बैंकले सेयर धितोमा राखेको सिमामा हेरफेर गरेको छैन । अधिकांशले मौद्रिक नीतिको त्रैमासिक समिक्षा मार्फत सेयर धितोको सिमा हटाइने वा परिवर्तन हुने अनुमान गरेका थिए ।
गत साउनमा केन्द्रिय बैंकले मौद्रिक नीति मार्फत सेयर धितोमा एकै संस्थाबाट कर्जा लिएमा ४ करोड र विभिन्न संस्थाबाट कर्जा लिएमा १२ करोडको सिमा तोकेको थियो ।
सो सिमाका कारण बजार ओरालो लागेको लगानीकर्ताहरुको दावी छ । तर नेपाल राष्ट्र बैंकले भने केही लगानीकर्ताहरुले मात्र १२ करोड भन्दा माथिको कर्जा लिएको भन्दै बजारमा सिमित लगानीकर्ताको हालीमुहाली भएको र यसले भविष्यमा समस्या सिर्जना गर्न सक्ने भन्दै ४/१२ को सिमा लगाएको हो ।
सो सिमा हटाउनु पर्ने भन्दै लगानीकर्ताहरुले अनसन बस्नेदेखि गभर्नर महाप्रसाद अधिकारीको राजीनामा माग गर्दै राष्ट्र बैंकको मुख्य कार्यालय घेराउ गर्ने कार्य समेत गरेका थिए ।
त्यस्तै सो व्यवस्था परिवर्तनको लागि विभिन्न ठाउँबाट गभर्नर अधिकारीलाई दवाव पनि आएको थियो । तर उनले त्रैमासिक समिक्षा गर्दा पनि सेयर कर्जाको व्यवस्था भने परिवर्तन गरेनन् ।
वि.सं.२०७८ मंसिर १० शुक्रवार ११:२४ मा प्रकाशित