काठमाडौं । संचालनमा रहेकामध्ये हालसम्म आधा दर्जन विकास बैंकहरुले लाभांश घोषणा गरेका छन् । विकास बैंकहरुले आर्थिक वर्ष २०७७/७८ मुनाफबाट लाभांश घोषणा गरेका हुन् । हालसम्म कामना सेवा विकास बैंक, लुम्बिनी, मुक्तिनाथ, सांग्रिला डेभलपमेन्ट र शाइन रेसुङ्गा डेभलपमेन्ट र महालक्ष्मी विकास बैंकले लाभांश घोषणा गरेका छन् ।
जसमध्ये सबैभन्दा बढी लाभांश महालक्ष्मी विकास बैंकले दिने भएको छ । बैंकले गत आवको मुनाफबाट सेयरधनीहरुलाई २१.०५ प्रतिशत लाभांश दिने भएको हो । बैंकले सेयरधनीहरुलाई २० प्रतिशत बोनस र कर प्रयोजनकाल लागि १.०५ प्रतिशत नगद लाभांश दिने प्रस्ताव गरेको हो । उक्त प्रस्तावित लाभांश नेपाल राष्ट्र बैंकबाट स्वीकृत भई बैंकको अगामी साधारणसभाबाट पारित भएपश्चात वितरण हुने छ ।
यस्तै, कामना सेवा विकास बैंकले १८.५ प्रतिशत बोनस सेयर र कर प्रयोजनका लागि ०.९७ प्रतिशत नगद गरि कुल १९.४७ प्रतिशत लाभांश दिने घोषणा गरेको छ । यी ६ वटा विकास बैंकमध्ये सबैभन्दा कम सांग्रिला डेभलपमेन्ट बैंकको देखिएको छ । बैंकले सेयर लगानीकर्ताहरुलाई १० प्रतिशत बोनस र ०.५३ प्रतिशत नगद गरि कुल १०.५३ प्रतिशत लाभांश दिने भएको हो ।
मुक्तिनाथ विकास बैंकले आर्थिक वर्ष २०७७/७८ को मुनाफबाट सेयरधनीहरुलाई १८.५१ प्रतिशत लाभांश दिने भएको छ । जसमध्ये १७.५८ प्रतिशत बोनस र ०.९३ प्रतिशत नगद लाभांश रहेको छ ।
यस्तै, लुम्बिनी विकास बैंकले १३.७१ प्रतिशत लाभांश दिने भएको छ । बैंकले सेयरधनीलाई १० प्रतिशत बोनस सेयर र ३.७१ प्रतिशत नगद लाभांश दिने भएको हो । यता, शाइन रेसुङ्गा डेभलपमेन्ट बैंकले भने साढे ११ प्रतिशत लाभांश दिने घोषणा गरेको छ । बैंकले आव २०७७/७८ मुनाफबाट सेयरधनीहरुलाई १०.९३ प्रतिशत बोनस सेयर र ०.५७ प्रतिशत नगद लाभांश दिने भएको हो ।
वि.सं.२०७८ मंसिर १३ सोमवार १३:२७ मा प्रकाशित