काठमाडौं । शाखा कार्यालय संचालनका लागि गरिमा विकास बैंकले घर भाडामा खोजेको छ ।बैंकले प्रदेश नम्बर २ र ५ का दुई शाखा कार्यालय संचालनका लागि घर भाडामा खोजेको हो ।
एक सूचना निकाल्दै बैंकले बुटवल क्लस्टर/ड्राइभरटोला शाखा र लालबन्दी क्लस्टर/शाखाका लागि घर भाडामा आवश्यक रहेको जनाएको छ ।
उक्त स्थानहरुमा बैंकलाई घर भाडामा दिन इच्छुक घरधनीहरुले आवश्यक कागजातसहित बैंकको प्रधान कार्यालय, सामान्य प्रशासन विभागमा निवेदन पेश गर्न सक्नेछन् । निवेदन आजैका मितिले १५ दिनभित्र कार्यालय समयमा पेश गर्नुपर्ने सूचनामा उल्लेख छ ।
प्रस्तावित घरको क्षेत्रफल कम्तीमा २ वर्गफिट हुनुपर्ने, पक्की घर हुनुपर्ने बैंकले जनाएको छ । घरको बाहिरी बनावटमा कुनै असर नपर्ने गरि भित्रि बनावटलाई बैंकले आफ्नो आवश्यकता अनुसार पुननिर्माण गर्नुपर्ने भएका ले घरधनी सहमत हुनुपर्ने सर्त रहेको छ ।
घर कम्तीमा १० वर्षसम्मका लागि सम्झौता गर्नुपर्ने, कार्यालय रहने घरमा आवश्यक पानी, ढल, पार्किङ लगायतका सुविधा भएको हुनुपर्ने बैंकले जनाएको छ।
यसका साथै घरमा थ्री फेज लाइन, संचारका उपकरणहरु जडान र आवश्यक जेनेरेटर लगायतका उपकरणहरु राख्ने स्थान भएको हुनुपर्ने सूचनामा उल्लेख छ।
निवेदक वा प्रस्तावकले घरधनीको नागरिकताको प्रमाणपत्रको प्रतिलिपि, लालपुर्जा तथा तिरो/सम्पत्तिकर तिरेको रसिद, नक्सा पास लगायतका कागजातहरुले संलग्न गर्नुपर्नेछ ।
वि.सं.२०७८ पुस १ बिहीवार १२:०७ मा प्रकाशित