काठमाडौं । नबिल बैंकले साधारण सभाका लागि मिति तय गरेको छ । बैंकले आउँदो पुस ३० गते वार्षिक साधारण सभा गर्ने भएको हो ।
सभामा लाभांश पारित गर्ने मुख्य एजेण्डा रहेको छ । बैंकले गत आर्थिक वर्ष २०७७/७८ को मुनाफबाट सेयरधनीहरुलाई ३८ प्रतिशत लाभांश दिने प्रस्ताव गरेको छ ।
जसमध्ये ३३.६० प्रतिशत बोनस सेयर र कर प्रयोजनका लागि ४.४० प्रतिशत नगद लाभांश दिने प्रस्ताव गरेको हो ।
सभामा बैंकले अन्य उपयुक्त बैंक तथा वित्तीय संस्थाहरू एक आपसमा गाम्न गाभिन तथा वैदेशिक रणनीतिक साझेदारीमा जान र सो सम्बन्धी आवश्यक सम्पूर्ण कार्य अगाडि बढाउन सञ्चालक समितिलाई अख्तियारी प्रदान गर्ने विशेष प्रस्तावसमेत पारित गर्ने छ ।
साथै सभाले सञ्चालक समितिको प्रतिवेदन, आर्थिक वर्ष २०७७/७८ को लेखापरीक्षक प्रतिवेदनसहितको वासलात, एकीकृत आयव्यय हिसाब, नाफा/नोक्सान हिसाब तथा प्रवाह विवरण, सोसँग सम्बन्धित अनुसूचीहरु सहितको वित्तीय विवरण पारित गर्नेछ ।
यसका साथै लेखापरीक्षकको नियुक्ति गर्ने र निजको पारिश्रमिक निर्धारण गर्ने लगायत विविध प्रस्तावहरु माथि छलफल गरि पारित हुने बैंकले जनाएको छ ।
बैंकले साधारण सभा र लाभांश वितरण प्रयोजनको लागि पुस १६ गते १ दिनका लागि बुक क्लोज गर्ने भएको छ ।
वि.सं.२०७८ पुस ९ शुक्रवार ०८:५४ मा प्रकाशित