काठमाडौं । चालु आर्थिक वर्ष २०७८/७९ को पाँच महिनाको अवधिमा ३३ करोड बढीको सुनका गहना निर्यात भएको छ ।
उक्त अवधिमा ३३ करोड ४१ लाख ३ हजार रुपैयाँ बराबरको सुनका मौलिक गहना निर्यात भएको छ ।भन्सार विभागले हालै सार्वजनिक गरेको मंसिर मसान्तसम्मको तथ्याङ्कले यस्तो देखाएको हो ।
चालु आवको पाँच महिनामा ३९ केजी बढी सुनका गहना बाहिरएको विभागले जनाएको छ ।विभागका अनुसार एक महिनाकै अवधिमा सुनको गहना निर्यात ११.८९ प्रतिशतले वृद्धि भएको हो ।
कात्तिक मसान्तसम्म २९ करोड ८५ लाख ७६ हजार रुपैयाँ बराबरको सुनका गहना निर्यात भएको थियो ।
विभागका अनुसार नेपालीहरुको बसोबास बढी हुने गरेको देशहरुबाट यस्ता खालका गहना माग हुने गरेको छ । नेपालबाट अमेरिका, अष्ट्रेलिया र हङकङमा सुनका मौलिक गहना पुग्ने गरेको छ ।
विभागका अनुसार पछिल्लो समयमा नेपालीहरुको बसोबास बढी भएका मुलुकहरुमा गहना निर्यात हुने गरेको छ । विशेषगरि ति देशहरुमा नेपाली मौलिक गरगहनाको निर्यात भएको हो । नेपालबाट यस्ता खालका गहनाहरु गत आर्थिक वर्षदेखि निर्यात हुन थालेको हो ।
चालु आवको मंसिर मसान्तसम्ममा नेपालबाट सबैभन्दा बढी अमेरिकामा सुनका गहना निर्यात भएको छ । पाँच महिनाको अवधिमा २८ करोड ३८ लाख २९ हजार रुपैयाँ बराबरको ३२ केजी बढी सुनका गहना अमेरिका पुगेको हो ।
यस्तै, हङकङमा भने ४ करोड ३२ लाख २५ हजार रुपैयाँ बराबरको सुनका गहना निर्यात भएको विभागले जनाएको छ । मंसिर मसान्तसम्म उक्त देशमा ५ केजी बढी सुनका गहना पुगेको हो ।
त्यसैगरि अष्ट्रेलियमा भने ७० लाख ४८ हजार रुपैयाँ बराबरको सुनका गहना निर्यात भएको छ । उक्त देशमा ६४६ ग्राम सुनका मौलिक गहना निर्यात भएको विभागले जनाएको छ ।
कात्तिक मसान्तसम्म भने अमेरिकामा २५ करोड ७० लाख ९९ हजार रुपैयाँ बराबरको २९ केजी, हङकङमा ३ करोड ४४ लाख २९ हजार रुपैयाँ बराबरको ४ केजी र हङकङमा ७० लाख ४८ हजार रुपैयाँ बराबरका सुनका गहना निर्यात भएको थियो ।
वि.सं.२०७८ पुस १४ बुधवार १४:४८ मा प्रकाशित