काठमाडौं । नेपाल एसबिआई बैंकको २८ औँ वार्षिक साधारण सभा सम्पन्न भएको छ । बैंकको सभा मंगलबार त्रिभुवन आर्मी अफिसर्स क्लब, भद्रकाली काठमाडौंमा सम्पन्न भएको हो ।
सभाले गत आर्थिक वर्ष २०७७/७८ को मुनाफबाट सेयरधनीलाई ५.३१ प्रतिशत लाभांश वितरण गर्ने प्रस्ताव पारित गरेको छ ।
बैंकले सेयरधनीहरुलाई ३.५० प्रतिशत बोनस सेयर र कर प्रयोजनका लागि १.८१ प्रतिशत नगद लाभांश वितरण गर्ने प्रस्ताव गरेको थियो ।
सभाले सर्वसाधारण सेयरधनीको तर्फबाट संचालक समितीमा प्रतिनिधित्व गर्ने संचालकमा अप्सरा उप्रेतीलाई निर्विरोध निर्वाचित गरेको छ । सभाले बैंकको आव २०७७/७८ को संचालक समितिको प्रतिवेदन, वार्षिक आर्थिक विवरण पारित गरेको छ ।
यसका साथै सभाले बैंकको सहायक कम्पनी “नेपाल एसबिआई मर्चेण्ट बैकिङ्ग लि.” को आ.व. २०७७/७८ को वित्तीय विवरण सहितको एकीकृत वित्तीय विवरण समेत स्वीकृत गरेको छ ।
मंगलबार सम्पन्न सभाले आव २०७८/७९ मा बैंकको लेखापरीक्षण गर्नका लागि मेशर्सएस.ए.आर. एसोसियट्स्, चार्टर्ड एकाउण्टेन्ट्स्लाई लेखापरीक्षकमा नियुक्ति तथा निजको पारिश्रमिक अनुमोदन, बैंकको प्रबन्धपत्र तथा नियमावलीका विविध दफा/नियममा संशोधन गर्ने प्रस्ताव समेत पारित गरेको छ ।
त्यसैगरि बैंकको तर्फबाट अन्य उपयुक्त बैंक तथा वित्तीय संस्थाहरु गाभ्ने/गाभिने (मर्जर) वा प्राप्ती (एक्विजिसन) गर्न आवश्यक सहमति र सम्झौता गर्ने लगायत आवश्यक कामहरु गर्न/गराउन सक्ने अख्तियारी सञ्चालक समितिलाई प्रत्यायोजन गर्ने प्रस्ताव समेत पारित गरेको छ ।
वि.सं.२०७८ पुस २० मंगलवार १७:३० मा प्रकाशित
