काठमाडौं । सनराइज बैंकले ‘कपाल प्रत्यारोपण’ योजना ल्याएको छ ।
बैंकले आफ्ना ग्राहकले आफ्नो आवश्यकतालाई भविष्यका लागि थाती राख्न नपरोस् भनेर ‘बाई नाउ पे लेटर’ योजनाअन्तर्गत विभिन्न सेवा र सुविधाका ईएमआई फ्यासिलिटी दिँदै आएको छ ।
यसै क्रममा बैंकले पृथक किसिमको सेवा ‘कपाल प्रत्यारोपण’मा पनि ईएमआई प्यासिलिटी ल्याएर सहजीकरण गरिदिएको हो ।
उक्त सेवालाई अझै सहजीकरण गर्न र ग्राहकलाई एकैचोटि आर्थिक भार पर्न नदिन सनराइज बैंकले सिद्धार्थनगर सिटी अस्पतालसँग सम्झौता गरी ईएमआईमा कपाल प्रत्यारोपण गर्ने व्यवस्था गरेको छ ।
गत पुस १९ गते सिद्धार्थनगर सिटी हस्पिटलमा भएको एक कार्यक्रममा हस्पिटलका प्रबन्ध निर्देशक अर्जुन पौडेल, डर्माटोलोजी विभाग प्रमुख चन्द्र मोहन शाह र बैंकका शाखा प्रमुख हरिहर सुवेदीबीच सम्झौतापत्रमा हस्ताक्षर भएको छ । अस्पतालले सनराइज बैंकसँग सहकार्य गरेर किस्ताबन्दी सुविधा दिएको छ ।
बैंकले प्रत्यारोपणका लागि ५० हजार रुपैयाँदेखि ३ लाख रुपैयाँसम्म यस्तो ऋण बिना धितो नै शून्य ब्याजदरमा उपलब्ध गराउने छ ।
अठार महिनासम्म किस्तामा तिर्न मिल्ने ऋणका लागि आयस्रोत भने खुलाउनुपर्ने जनाइएको छ । लग्जरी सुविधा भएकाले एकैपटक शुल्क तिर्न गाह्रो हुनेलाई लक्षित गरेर ऋणको व्यवस्था गरिएको बैंकले जनाएको छ ।
यसअघि पनि बैंकले चितवनस्थित चितवन मेडिकल कलेज शिक्षण अस्पताल, काठमाडौंको कोटेश्वरस्थित के३३ हेयर होटल, विशालनगरस्थित एरोजिन हेल्थ केयर एन्ड रिसर्च सेन्टर, बालुबाटारस्थित हेल्दी च्वाइस न्युट्रिसन एन्ड फिटनेस क्लिनिक र पोखराको फेवा हेल्थ केयरमा कपाल प्रत्यारोपण/प्रतिस्थापन गर्न आउने सेवाग्राहीलाई यस्तो सुविधा दिने सम्झौता गरिसकेको छ ।
वि.सं.२०७८ पुस २३ शुक्रवार ०९:१० मा प्रकाशित