काठमाडौं । कुनैपनि नेपाली उद्योगीहरुले विदेशी प्रविधि वा सामाग्री आयात गर्नका लागि सम्झौता गर्नुअघि उद्योग विभागको अनिवार्य स्वीकृति लिनुपर्ने भएको छ ।
विभागले सुचना जारी गरी ५ हजार डलर तथा एक लाख भारु भन्दा माथिको विदेशी प्रविधि वा सामाग्री आयात गर्नुअघि सम्झौता गर्नकै लागि पनि विभागको स्वीकृति अनिवार्य बनाएको हो । यदि जानकारी नदिइ निवेदन आएमा त्यस्तो लगानी स्वीकृत नहुने विभागले जनाएको छ।
पछिल्लो समयमा विभिन्न कम्पनीहरुले विदेशमा भुक्तानी पठाउनका लागि निवेदन दिनेको संख्यामा बृद्धि भएपछि विभागले शंका गरेर सो सुचना जारी गरेको हो । पछिल्लो समयमा विदेशमा भुक्तानी गर्ने कम्पनीहरुको संख्यामा ह्वात्तै बृद्धि भएपछि शंका लागेका कारण यस्तो व्यवस्था गरिएको विभागले जनाएको छ ।
त्यस्तै पछिल्लो समयमा देशमा विदेशी मुद्रा सञ्चितिमा समस्या भएका कारण पनि राष्ट्र बैंकले विदेशी मुद्राको भुक्तानीमा कडाइ गरेपछि विभागले पनि यस विषयमा कडाइ गर्न थालेको कम्पनीले जनाएको छ ।
वि.सं.२०७८ पुस २५ आइतवार १२:१८ मा प्रकाशित