प्रकाशकीय …
विकास, समृद्धि र रुपान्तरणमा आर्थिक कोणबाट बहस चलाउन सशक्त सञ्चार माध्यमको परिकल्पना गरी डेभलपमेन्ट मिडिया प्रमोशन प्रा.लिको व्यवस्थापनमा अर्थतन्त्र डटकमको शुरभारम्भ गरिएको आज छैठौं वर्ष पुरा भएको छ ।
पत्रकार आचारसंहिता र कानूनको परिधिभित्र रही विशुद्ध व्यवसायिक मिसन बोकेर जनतालाई सुसूचित गर्ने, आर्थिक उन्नतिका आधारहरु खोतल्ने, अनियमिततामा खबरदारी गर्ने अगुवा माध्यमको रुपमा हामीले २०७२ माघ १ गते अर्थतन्त्रलाई विश्व व्यापी सञ्जालमा सम्प्रेषण गरी तपाईं सामु पुर्याउने प्रयत्न गरेका थियौं ।
परम्परागत सञ्चार माध्यमहरु (छापा र विद्युतिय)को भिडबाट जबर्जस्त उदाउँदै गरेको न्यूमिडियाको डिजिटल भर्सन, त्यसमा पनि एउटा बिटको रुपमा रहेको आर्थिक पत्रकारितालाई मुलधारको पत्रकारितामा स्थापित गर्न चुनौतिपूर्ण नै थियो । सानो विज्ञापन बजार, सिमित दक्ष जनशक्तीकाबीच कठिनतम घडीमा स्थापित भएर आफ्नो अविराम यात्राको छैठौं वर्ष पुरा गर्न सफल हुनु आफैमा गौरवको कुरा हो ।
यस शुभ अवशरमा हामीलाई निरन्तर अगाडी बढिरहन माया हौसला र प्रेरणा दिनुहुने आम पाठक, विज्ञापन दाता, शुभचिन्तकहरुप्रति हार्दिक आभार व्यक्त गर्दछौं । यहाँहरुको माया सद्भाव, सूचना एवं सल्लाहको संदैव प्रतिक्षरत छौं ।
वि.सं.२०७८ माघ १ शनिवार २०:०५ मा प्रकाशित