काठमाडौं । एभरेष्ट बैंकले आजदेखि (माघ ३ गते) बार्षिक ८.५ प्रतिशत व्याजदरको २ अर्ब रुपैयाँ बराबरको ऋणपत्र निष्काशन गरेको छ ।
‘एभरेष्ट बैंक लिमिटेड ऋणपत्र २०८६’ नामले निष्काशन गरेको उक्त ऋणपत्रमा छिट्टोमा माघ ६ र ढिलोमा माघ १७ गते सम्म आवेदन दिन सकिने छ ।
बैंकले जारी गर्न लागेको यो ऋणपत्र दोस्रो हो । यसअघि बैंकले २०७९ मा परिपक्व हुनेगरी ऋणपत्र जारी गरेको थियो । आठ बर्षको समयावधि राखेर जारी गर्न लागेको ऋणपत्रको अंकित मुल्य एक हजार रुपैयाँ हो ।
यसअघि जारी गरेको ऋणपत्रमा ८ प्रतिशत मात्र व्याज थियो तर बजारमा तरलता अभाव भएका कारण बैंकले ०.५ प्रतिशतले व्याज बढाएको छ ।
बैंकले १२ लाख कित्ता ऋणपत्रमा व्यक्तिले आवेदन दिन सक्नेछन् भने ८ लाख कित्तामा सर्वसाधारणले लगानी गर्न सक्ने जनाएको छ ।
उक्त ऋणपत्र खरीदका लागि न्यूनतम २५ कित्तादेखि अधिकतम १ लाख कित्ताका लागि आवेदन दिन सकिने बैंकले जनाएको छ ।
ऋणपत्र निष्कासन तथा विक्री प्रबन्धकमा एनआईबिएल एस क्यापिटल लिमिटेड रहेको छ ।
वि.सं.२०७८ माघ ३ सोमवार १२:२३ मा प्रकाशित
