काठमाडौं । एनएमबि बैंकले चालु आर्थिक वर्ष २०७८/७९ को दोस्रो त्रैमासिक वित्तीय विवरण सार्वजनिक गरेको छ ।
सोमबार प्रकाशित वित्तीय विवरण अनुसार बैंकले चालु आवको पुस मसान्तसम्ममा १ अर्ब ७१ करोड १५ लाख १९ हजार रुपैयाँ नाफा कमाएको छ । जुन गत वर्षको सोही अवधिको तुलनामा ६.०४ प्रतिशतले बढी हो । गत वर्षको पुस मसान्तसम्ममा बैंकले १ अर्ब ५० करोड ९६ लाख ९२ हजार रुपैयाँ नाफा कमाएको थियो ।
उक्त अवधिमा बैंकको खुद ब्याज आम्दानी भने घटेको देखिएको छ । गत वर्षको पुस मसान्तसम्ममा २ अर्ब ८६ करोड ९४ ला ख ९२ हजार रुपैयाँ खुद ब्याज आम्दानी गरेको बैंकले यस वर्षको सोही अवधिमा भने ५.३७ प्रतिशतले घटेको हो । यस वर्षको उक्त अवधिमा बैंकको खुद ब्याज आम्दानी २ अर्ब ७१ करोड ५५ लाख १६ हजार रुपैयाँ रहेको छ ।
चालु आवको दोस्रो त्रैमासमा बैंकको संचालन मुनाफा ५.३८ प्रतिशतले वृद्धि भई २ अर्ब ४२ करोड २९ लाख ८७ हजार रुपैयाँ पुगेको छ । गत वर्षको सोही अवधिमा भने यो नाफा २ अर्ब २९ करोड ९३ लाख २१ हजार रुपैयाँ रहेको थियो । बैंकको वितरण योग्य मुनाफा ८७ करोड ४१ लाख ६ हजार रुपैयाँ रहेको छ ।
यस्तै, चालु आवको पुस मसान्तसम्ममा बैंकले १ खर्ब ८१ अर्ब ७० करोड ६ लाख ४८ हजार रुपैयाँ निक्षेप संकलन गरि १ खर्ब ७२ अर्ब १४ करोड ५१ लाख १३ हजार रुपैयाँ कर्जा प्रवाह गरेको छ । गत वर्षको सोही अवधिका तुलनामा निक्षेप संकलन र कर्जा प्रवाह क्रमशः १०.४६ प्रतिशत र १३.९९ प्रतिशतले बढेको हो ।
बैंकको चुक्ता पुँजी १८ अर्ब ३६ करोड ६७ लाख ६ हजार रुपैयाँ रहेको छ । बैंकले जगेडा तथा कोषमा भने ६ अर्ब ७५ करोड ९३ लाख ९९ हजार रुपैयाँ राखेको छ ।
चालु आवको पुस मसान्तसम्ममा बैंक खराब कर्जा पनि घटाएको छ । गत वर्षको दोस्रो त्रैमासमा २.३८ प्रतिशत रहेको खराब कर्जा यस वर्षको सोही अवधिमा भने १.४९ प्रतिशतमा झारेको छ ।
बैंकको प्रतिसेयर आम्दानी १८ रुपैयाँ ६४ पैसा र प्रतिसेयर नेटवर्थ १३६ रुपैयाँ ८ पैसा रहेको छ ।
वि.सं.२०७८ माघ १० सोमवार ०९:२६ मा प्रकाशित