काठमाडौं । समुहिक रुपमा अमेरिकी डलरको अवैध कारोबार गरेका चार जना विरुद्ध राजस्व अनुसन्धान विभागले जिल्ला अदालत काठमाडौंमा मुद्धा दायर गरेको छ । विभागले कैलाली लमकिचुवा १० का स्थायी बासिन्दा दिनेश खड्का, उनकी दिदी भगवती खड्का, उनका वुवा नरबहादुर खड्का र उनकी प्रेमिका अनिता धिताल समेतलाई प्रतिवादी बनाएर मंगलबार जिल्ला अदालत काठमाडौमा ३७ करोड ६४ लाख ११ हजार १०० रुपैयाँ माग दावी सहित मुद्धा दायर गरेको हो ।
उनीहरुले काठमाडौको कालोपुलमा मोवाइल एप्स इ–स्क्रील तथा विनान्स प्रयोग गरी अनलाईन मार्फत डलरको अवैध रुपमा कारोबार गरेको पाइएको थियो । विभागले कल डिटेल, बैंक एकाउन्ट मोवाइल एप्स लगायत विभिन्न कुराहरुको छानविन पछि उनीहरु विरुद्ध मुद्धा दायर गरेको हो ।
प्रतिवादी दिनेश खड्काले इ स्क्रील विनान्स मार्फत रकम लोड तथा अनलोड गरी अमेरिकी डलर अवैध रुपमा सटही गर्ने गरेको विभागले जनाएको छ ।
विभागका अनुसार खड्काको ग्लोवल आइएमइए बैंकबाट समेत ९ करोड ७९ लाख ९८ हजार ५८१, उनकी प्रेमिका अनिता धिताको लक्ष्मी बैंकबाट पाँच करोड ७७ लाख ६ हजार ८२६, भगवती खडकोका एनआइसी एसिया बैंकबाट समेत २० करोड ४२ लाख ९४ हजार ५२६ र नरबहादुर खड्काको ग्लोवल आइएमई बैंकबाट १ करोड ६४ लाख ११ हजार १६६ रुपैयाँ राखी डलरको कारोबार गरेको पाइएको थियो ।
सवैको खाताबाट जम्मा ३७ करोड ६४ लाख ११ हजार १०० रुपैयाँ अर्थात् ३१ लाख २७ हजार ८९६ रकम डलर रहेको र सोही रकम विभागले विगो दावी सहित प्रतिवादी दिनेश खड्कालाई तीन बर्षसम्मको कैद सजाय मागदावी गरेको जनाएको छ ।
वि.सं.२०७८ माघ ११ मंगलवार १४:५२ मा प्रकाशित
