शर्मिला ठकुरी
काठमाडौं । बाणिज्य बैंकहरुले चालु आर्थिक बर्षको ६ महिनामा कमाएको रकमबाट औषत १४.३३ प्रतिशतले पुँजीमा प्रतिफल (आरओइ) दिन सक्ने देखिएको छ । यो गत आर्थिक बर्षको सोही अवधिको तुलनामा भने १.६४ प्रतिशतले बढी हो ।
गत आर्थिक बर्षको पहिलो ६ महिनामा कोरोनाका कारण बजार बन्द हुदा बैंकहरुले व्यापार बढाउन सकेनन् जसका कारण उनीहरुको नाफा खुम्चनुको साथै प्रतिफल दिन सक्ने क्षमतामा पनि गिरावट आएको थियो ।
हुन त चालु आर्थिक बर्षको पहिलो ६ महिनामा बैकिङ क्षेत्रले ठूलो तरलता अभाव खोप्नु पर्यो जसका कारण पछिल्लो तीन महिना ज्यादै कष्टकर बन्न पुग्यो । तर पहिलो तीन महिनामा पर्याप्त तरलता हुदा व्यापार बढाएका कारण कमाएकोले नाफामा १० प्रतिशत अर्थात् ३ अर्ब १३ करोड रुपैयाँले बृद्धि भएको थियो । जसका कारण उनीहरुले दिने प्रतिफलमा पनि बृद्धि भएको हो ।
चालु आर्थिक बर्षको पहिलो ६ महिनामा बाणिज्य बैंकहरुले ३४ अर्ब २१ करोड रुपैयाँ खुद नाफा गरेका थिए । गत आर्थिक बर्षको पहिलो ६ महिनामा बैंकहरुले ३१ अर्ब ७ करोड रुपैयाँ खुद नाफा कमाएका छन् ।
चालु आर्थिक बर्षको ६ महिनाको तथ्यांक हेर्दा सवैभन्दा बढी प्रतिफल एनआइसी एसियाले दिन सक्ने भएको छ । सो बैंकले २३.१९ प्रतिशतले आफ्ना सेयरधनीहरुलाई प्रतिफल दिन सक्ने भएको छ । तर सो प्रतिफल गत बर्षको सोही महिनाको तुलनामा झन्डै १ प्रतिशतले कमी हो । गत पुस मसान्तसम्ममा सो बैंकले २४ प्रतिशत प्रतिफल दिन सक्नेगरी कमाएको थियो ।
त्यस्तै सवैभन्दा कम प्रतिफल दिनेमा हिमालयन बैंक परेको छ । सो बैंकले चालु आर्थिक बर्षको पहिलो ६ महिनामा ७.५८ प्रतिशत मात्र प्रतिफल दिन सक्ने देखिएको छ। हुन त गत आर्थिक बर्षको पहिलो ६ महिनामा पनि सो बैंकको प्रतिफल दिन सक्ने क्षमता ७.६७ प्रतिशत मात्र थियो तर आर्थिक बर्षको अन्तमा २६ प्रतिशत लाभांस दिएको थियो । सो बैंकले खराव कर्जा हुन नदिनका लागि प्रोभिजनिङमा बढी रकम राख्ने भएकोले पनि उसले दिने प्रतिफल निक्कै कम देखिने गरेको छ ।
त्यस्तै सिभिल बैंकले भने गत आर्थिक बर्षको तुलनामा मिराकल गरेको छ । गत आर्थिक बर्षको ६ महिनामा सिभिल बैंकको जम्मा ३.९८ प्रतिशत मात्र प्रतिफल दिने क्षमता चालु आर्थिक बर्षको पुस मसान्तसम्ममा बैंकले ९.४४ प्रतिशत प्रतिफल दिन सक्ने भएको छ ।
बैंकले नाफामा पनि राम्रो प्रगति गरेको छ । चालु आर्थिक बर्षको पुस मसान्तसम्ममा बैंकले ५० करोड ४० लाख रुपैयाँ खुद नाफा गर्न सफल भएको छ । गत आर्थिक बर्षको सोही अवधिमा भने जम्मा २० करोड २८ लाख रुपैयाँ मात्र खुद नाफा गरेको थियो ।
कुन बैंकको प्रतिफल दिने क्षमता कति हेर्नुहोस् ।
वि.सं.२०७८ माघ १३ बिहीवार १३:५३ मा प्रकाशित