शर्मिला ठकुरी
काठमाडौं । चालु आर्थिक बर्षको ६ महिनामा बाणिज्य बैंकहरुले १४ अर्ब ११ करोड ७५ लाख रुपैयाँ आयकर वापत सरकारलाई राजस्व बुझाएका छन् । बैंकहरुले कमाएको नाफाबाट सो रकम सरकारलाई बुझाएका हुन् ।
चालु आर्थिक बर्षको ६ महिनामा बैंकहरुले ४८ अर्ब ३२ करोड ८२ लाख रुपैयाँ नाफा गरेका थिए । सो नाफाबाट बैंकहरुले सरकारालाई आयकर बापत सो रकम बुझाएका हुन् । बाणिज्य बैंकहरुको आयकर तिरेपछिको नाफा भने ३४ अर्ब २१ करोड ६ लाख रुपैयाँ छ ।
बाणिज्य बैंकहरुले आयकरको ३० प्रतिशत रकम सरकारलाई आयकर बापत अग्रिम बुझाउनुपर्दछ । गत बर्षको सोही अवधिमा बैंकहरुले १३ अर्ब २६ करोड ३३ लाख रुपैयाँ आयकर मापत सरकारालाई राजस्व बुझाएका थिए । गत आर्थिक बर्षमा सरकारलाई बाणिज्य बैंकहरुले २७ अर्ब ३७ करोड ६६ लाख रुपैयाँ बराबरको आयकर बुझाएका थिए ।
आर्थिक बर्षको ६ महिनाको अवधिमा दुई वटा बैंक (एनआइसी एसिया र ग्लोवल आइएमई बैंक) ले मात्र अर्ब रुपैयाँ भन्दा बढी आयकर बुझाएका छन् । सवैभन्दा बढी एनआइसी एसिया बैकले १ अर्ब २ करोड ९४ लाख र ग्लोवल आइएमई बैंकले एक अर्ब १ करोड ६६ लाख रुपैयाँ आयकर बापत सरकारालाई राजस्व बुझाएका छन् ।
त्यस्तै यो अवधिमा सवैभन्दा कम राजस्व बुझाउने बैंकमा सिभिल बैंक रहेको छ । सो बैंकले यस अवधिमा जम्मा २२ करोड ८२ लाख रुपैयाँ सरकारालाई आयकर बापत राजस्व बुझाएको हो ।
बैंकहरुले आयकर बुझाएपछिको रकम मात्र खुद आयमा गणना गर्न पाउँछन् । गत आर्थिक बर्षको पुस मसान्तसम्ममा ग्लोवल आइएमईले बढी राजस्व तिरेकोमा आर्थिक बर्ष सकिदा भने नविल बैंक आयकर तिर्नेमा पहिलो भएको थियो ।
नविल बैंकले गत आर्थिक बर्षमा १ अर्ब ७२ करोड ७९ लाख रुपैयाँ आयकर सरकारलाई बुझाएको थियो । गत आर्थिक बर्षको पहिलो ६ महिनामा कुनैपनि बैंकले एक अर्ब रुपैयाँ आयकर तिरेका थिएनन् ।
तर आर्थिक बर्ष सकिदा भने नविल, ग्लोवल आइएमई, एनआइसी एसिया, कृषि विकास बैंक, राष्ट्रिय बाणिज्य बैंक, प्राइम, एनएमबी, नेपाल इन्भेष्टमेन्ट र सिद्धार्थ बैंकगरी नेपाल बैंक, हिमालयन बैंक र कुमारी बैंक गरी १२ वटा बाणिज्य बैंकले एक अर्ब रुपैयाँ भन्दा बढी आयकर तिरेका थिए ।
विदेशी लगानी भएका बैंकहरुले कति तिरे आयकर ?
विदेशी लगानी भएका बैंकहरुले गत बर्षको तुलनामा कम नै आयकर बुझाएका छन् । विदेशी लगानी भएका नेपाली बाणिज्य बैंकहरु हिमालयन, एभरेष्ट, एनएमबी, नविल, नेपाल बंगलादेश बैंक, नेपाल एसविआइ बैंक र स्ट्यान्डर्ड चार्टड बैंक हुन् ।
ति बैंकहरुले चालु आर्थिक बर्षको पहिलो ६ महिनामा क्रमशः ३१ करोड ८६ लाख, ३५ करोड ९५ लाख, ७१ करोड २८ लाख, ९३ करोड ५२ अर्ब, २५ करोड ७९ लाख, ३३ करोड ५४ लाख र ४६ करोड ५७ लाख रुपैयाँ आयकर तिरेका छन् । जुन गत आर्थिक बर्षको सोही महिनाको तुलनामा अधिकांशको बढी नै रहेको छ ।
वि.सं.२०७८ माघ १४ शुक्रवार १३:२४ मा प्रकाशित
