काठमाडौं । अरुण भ्याली हाइड्रोपावर कम्पनीले चालु आर्थिक वर्ष २०७८÷७९ दोस्रो त्रैमासिक वित्तीय विवरण सार्वजनिक गरेको छ ।
वित्तीय विवरण अनुसार उक्त अवधिमा कम्पनीले ७ करोड ४९ लाख २७ हजार रुपैयाँ नाफा कमाएको छ । जुन गत वर्षको पुस मसान्तसम्मको तुलनामा १०.१० प्रतिशतले बढी हो । गत वर्षको सोही अवधिमा कम्पनीले ६ करोड ८० लाख ५३ हजार रुपैयाँ नाफा कमाएको थियो ।
चालु आवको दोस्रो त्रैमाससम्ममा कम्पनीको विद्युत बिक्रीबाट हुने आम्दानी भने सामान्य वृद्धि भएको छ । उक्त अवधिमा कम्पनीले विद्युत बिक्रीबाट ४ करोड २ लाख ६९ हजार रुपैयाँ आम्दानी गरेको छ । यो आम्दानी गत वर्षको पुस मसान्तसम्मको तुलनामा भने २.११ प्रतिशतले मात्र बढी हो । गत वर्षको सोही अवधिमा कम्पनीले ३ करोड ९४ लाख ३८ हजार रुपैयाँ आम्दानी गरेको थियो ।
उक्त अवधिमा कम्पनीको संचालन मुनाफा १३.८६ प्रतिशतले वृद्धि भई १० करोड १ लाख २९ हजार रुपैयाँ पुगेको छ ।
कम्पनीको चुक्ता पुँजी १ अर्ब ७२ करोड ९५ लाख ९५ हजार रुपैयाँ रहेको छ । कम्पनीले जगेडा कोषमा भने १३ करोड ५२ लाख २६ हजार रुपैयाँ राखेको छ ।
उक्त अवधिमा कम्पनीको प्रतिसेयर आम्दानीमा भने गिरावट आएको छ । कम्पनीको प्रतिसेयर आम्दानी गत वर्षको पुस मसान्तको तुलनामा ४ रुपैयाँ ९७ पैसाले घटेर ८ रुपैयाँ ६६ पैसा कायम भएको छ । प्रतिसेयर नेटवर्थ भने १०७ रुपैयाँ ८२ पैसा रहेको छ ।
वि.सं.२०७८ माघ १७ सोमवार १०:१८ मा प्रकाशित
