काठमाडौं । सिभिल लघुवित्त वित्तीय संस्थाले चालु आर्थिक वर्ष २०७८÷७९ को दोस्रो त्रैमासिक वित्तीय विवरण सार्वजनिक गरेको छ ।
वित्तीय विवरण अनुसार उक्त अवधिमा कम्पनीले ३ करोड ७५ लाख ३३ हजार रुपैयाँ नाफा कमाएको छ । कम्पनीको यो नाफा गत वर्षको पुस मसान्तसम्मको तुलनामा भने ३६.८७ प्रतिशतले बढी हो । गत वर्षको सोही अवधिमा कम्पनीले २ करोड ७४ लाख २२ हजार रुपैयाँ नाफा गरेको थियो ।
उक्त अवधिमा कम्पनीको खुद ब्याज आम्दानी पनि ६७.६० प्रतिशतले वृद्धि भई ११ करोड ८४ लाख ५५ हजार रुपैयाँ पुगेको छ । गत वर्षको पुस मसान्तसम्म कम्पनीको यो आम्दानी ७ करोड ६ लाख ७४ हजार रुपैयाँ रहेको थियो ।
चालु आवको ६ महिनाको अवधिमा कम्पनीको संचालन मुनाफा ५ करोड ६९ लाख ६० हजार रुपैयाँ रहेको छ । जुन गत वर्षको सोही अवधिको तुलना ४०.१५ प्रतिशतले बढी हो । गत वर्षको पुस मसान्तसम्ममा कम्पनीको संचालन मुनाफा ४ करोड ६ लाख ४० हजार रुपैयाँ रहेको थियो ।
कम्पनीको चुक्ता पुँजी २८ करोड ८१ लाख २४ हजार रुपैयाँ रहेको छ । कम्पनीको जगेडा तथा कोषमा भने १० करोड ८० लाख ४१ हजार रुपैयाँ राखेको छ ।
उक्त अवधिमा कम्पनीले खराब कर्जा पनि घटाएको छ । गत वर्षको पुस मसान्तसम्ममा २.४१ प्रतिशत रहेको खराब कर्जा यस वर्षको सोही अवधिमा भने घटाएर १.३३ प्रतिशतमा झारेको छ ।
कम्पनीको प्रतिसेयर आम्दानी २६ रुपैयाँ ५ पैसा र प्रतिसेयर नेटवर्थ १३६ रुपैयाँ ३६ पैसा रहेको छ ।
वि.सं.२०७८ माघ १७ सोमवार १३:१२ मा प्रकाशित