काठमाडौं । ज्योति लाइफ इन्स्योरेन्स कम्पनीले पछिल्लो तीन महिनामा खुद नाफा ४५ प्रतिशतले बढाएको छ ।
समिक्षा अवधिमा मात्रै कम्पनीले ४ करोड १७ लाख २७ हजार खुद नाफा कमाएको हो ।
असोज मसान्तसम्म यस्तो नाफा ९ करोड २२ लाख ८० हजार कमाएकोमा पुस मसान्तसम्म आउँदा कम्नीको खुद नाफा १३ करोड ४० लाख बढी नाफा कमाउन सफल भएको हो ।
यद्यपी अघिल्लो आर्थिक वर्षको पुस मसान्तसम्मको तुलनामा भने यो नाफा मात्रै २४.२२ प्रतिशत बढी हो । कम्पनीले अघिल्लो आर्थिक वर्षको समिक्षा अवधिमा १० करोड ७८ लाख ७१ हजार खुद नाफा कमाएको थियो ।
यो नाफामा जीवन बीमा कोष मार्फत आर्जन भएको आम्दानीलाई उल्लेख नगरिने भएकाले जीवन बीमा कम्पनीको नाफा कम देखिने गरेको छ । जीवन बीमा कोष मार्फत आर्जन भएको मुनाफा एक्चुअरी प्रतिवेदन पछि मात्रै छुट्टाइन्छ । यहि नाफाका आधारमा प्रतिशेयर आम्दानी १२ रुपैयाँ रहेको छ ।
यसैगरी समिक्षा अवधिमा खुद बीमा शुल्क आर्जन १७.६९ प्रतिशत बृद्धि भएको छ । कम्पनीले यो अवधिमा एक अर्ब ६४ करोड रुपैयाँ खुद बीमा शुल्क आर्जन गरेको छ । गत वर्षको यहि अवधिमा कम्पनीले एक अर्ब ३९ करोड रुपैयाँ आर्जन गरेको थियो ।
यता कुल बीमा शुल्क आर्जन पनि १८.६२ प्रतिशतले बढेको छ । चालु आर्थिक वर्षको पुस मसान्तसम्म आउँदा कुल बीमा शुल्क आर्जन एक अर्ब ७१ करोड रुपैयाँ पुगेको हो ।
त्यस्तै कम्पनीको चुक्ता पूँजी २ अर्ब २० करोड रुपैयाँ रहेको छ भने जगेडा कोषमा ७२ करोड ९० लाख रुपैयाँ जम्मा भएको छ ।
चालु आर्थिक वर्षको दोस्रो त्रैमाशिक अवधिमा कम्पनीले आफ्नो जीवन बीमा कोष ७६.३० प्रतिशतले बढाउन सफल भएको छ । पुस मसान्तसम्ममा कम्पनीको जीवन बीमा कोषमा ५ अर्ब १४ करोड रुपैयाँ जम्मा भएको छ । गत वर्षको यहि अवधिमा यस्तो कोषमा २ अर्ब ९१ करोड रुपैयाँ थियो ।
वि.सं.२०७८ माघ १७ सोमवार १५:३९ मा प्रकाशित