काठमाडौं । कोभिडको पछिल्लो ओमिक्रोन भेरियन्टको त्रासकाबीच पनि मुलुकको पर्यटन क्षेत्र त्यत्ति प्रभावित नभएको पाईएको छ ।
जनवरीमा मात्रै विभिन्न देशबाट झण्डै १७ हजार पर्यटक नेपाल घुम्न आएको पाईएपछि ओमिक्रोनको प्रभाव न्युन रहेको मान्न सकिएको हो ।
अध्यागमन विभागले देखाको तथ्याङक अनुसार सन् २०२२ को पहिलो महिनामा नेपाल भ्रमण गर्ने पर्यटकको संख्या अघिल्लो वर्षको सोही अवधिको तुलनामा दोब्बरले वृद्धि भएको छ ।
विभागका अनुसार हवाई मार्ग हुँदै १६ हजार ९ सय ७५ जना पर्यटक नेपाल भित्रिएका छन् । गत वर्षको सोही अवधिमा ८ हजार ८ सय ७४ जना पर्यटक हवाई मार्ग हुँदै नेपाल भ्रमणमा आएका थिए । गत जनवरी महिनामा भारतसहित बंगलादेश, पाकिस्तान, भूटान, श्रीलंका लगायतका मुलुकबाट ५ हजार ५ सय एक जना पर्यटक नेपाल भित्रिएका छन् ।
यस्तै चीन, जापान लगायतका अन्य एसियाली मुलुकबाट एक हजार एक सय १४ जना, यूरोपेली मुलुकबाट ३ हजार ५ सय २७, ओसियाना क्षेत्रबाट १ हजार २ सय ४० तथा अमेरिका, क्यानडा लगायतबाट ३ हजार ६ सय १८ र अन्य विभिन्न मुलुकबाट १ हजार ९ सय ७५ जना नेपाल भ्रमणमा आएको विभागले जनाएको छ । कोरोना संक्रमणका बीचमा सरकारले स्वास्थ्य मापदण्ड पालना गरी पर्यटकलाई नेपाल आउने अनुमति दिइरहेको छ ।
कोभिड–१९ महामारीले लामो समय नराम्ररी थलिएको मुलुकको पर्यटन क्षेत्र अब भने विस्तारै तङ्ग्रिँदै जाने निश्चित छ । कोभिडको तेस्रो लहरसम्म आइपुग्दा महामारीको असहज परिस्थितिमा पनि विदेशी पर्यटक आगमन सकारात्मक हुनु मुलुकको पर्यटन क्षेत्रले गति लिएको मान्न सकिन्छ ।
यसरी ओमिक्रोनको त्रास बढी भएपनि यसको प्रभाव कम रहेको र कोभिड विरुद्धको खोप आधाभन्दा बढी जनसङ्ख्याले लगाइसकेकाले पर्यटन क्षेत्र विस्तारै चलायमान हुने देखिन्छ ।
वि.सं.२०७८ माघ २१ शुक्रवार ११:४४ मा प्रकाशित
