काठमाडौं । जीवन विकास लघुवित्त वित्तीय संस्थाले चालु आर्थिक वर्ष २०७८/७९ को दोस्रो त्रैमासिक वित्तीय विवरण सार्वजनिक गरेको छ ।
विवरण अनुसार कम्पनीले चालु आवको पुस मसान्तसम्ममा ४० करोड १६ लाख ५८ हजार रुपैयाँ नाफा कमाएको छ । जुन गत वर्षको सोही अवधिको तुलनामा ९.०९ प्रतिशतले बढी हो । गत वर्षको पुस मसान्तसम्ममा कम्पनीको यो नाफा ३६ करोड ८१ लाख ७२ हजार रुपैयाँ रहेको थियो ।
उक्त अवधिमा कम्पनीले खुद ब्याज आम्दानी पनि ३२.६५ प्रतिशतले वृद्धि भई ८० करोड ३० लाख १४ हजार रुपैयाँ पुगेको छ । गत वर्षको ६ महिनाको अवधिमा कम्पनीको यो आम्दानी ६० करोड ५३ लाख ५७ हजार रुपैयाँ रहेको थियो ।
चालु आवको ६ महिनाको अवधिमा कम्पनीको संचालन मुनाफा ४१ करोड ५३ लाख ७९ हजार रुपैयाँ रहेको छ । कम्पनीको उक्त अवधिमा १९ करोड ८३ लाख १९ हजार रुपैयाँ खराब कर्जा संकलन गर्न सफल भएको छ ।
कम्पनीको चुक्ता पुँजी ६० करोड ८४ लाख रुपैयाँ रहेको छ । कम्पनीले जगेडा तथा कोषमा भने १ अर्ब ७२ करोड २१ लाख ९० हजार रुपैयाँ राखेको छ ।
उक्त अवधिमा कम्पनीले खराब कर्जा पनि घटाएको छ । गत वर्षको पुस मसान्तसम्ममा ०.९५ प्रतिशत रहेको खराब कर्जा यस वर्षको सोही अवधिमा भने घटाएर ०.७५ प्रतिशतमा झारेको छ ।
कम्पनीको प्रतिसेयर आम्दानी १३२ रुपैयाँ ४ पैसा र प्रतिसेयर नेटवर्थ ३८३ रुपैयाँ ७ पैसा रहेको छ ।
वि.सं.२०७८ माघ २५ मंगलवार १०:१८ मा प्रकाशित