काठमाडौं । माउन्टेन इनर्जी नेपालले चाुल आर्थिक वर्ष २०७८/७९ को दोस्रो त्रैमासिक वित्तीय विवरण सार्वजनिक गरेको छ ।
मंगलवार प्रकाशित वित्तीय विवरण अनुसार कम्पनीले उक्त अवधिमा ४२ करोड ६३ लाख १ हजार रुपैयाँ नाफा गरेको छ ।
कम्पनीको यो नाफा गत वर्षको पुस मसान्तसम्मको तुलनामा भने ७८८ प्रतिशतले बढी हो । गत वर्षको सोही अवधिमा कम्पनीले ४ करोड ७६ लाख ६७ हजार रुपैयाँ मात्र नाफा गरेको थियो ।
कम्पनीको विद्युत बिक्री आम्दानी ह्वात्तै बढेपछि नाफामा उल्लेखीय सुधार भएको हो । उक्त अवधिमा कम्पनीले विद्युत बिक्रीबाट ६८ करोड २१ लाख ९८ हजार रुपैयाँ आम्दानी गरेको छ । कम्पनीको यो आम्दानी गत वर्षको पुस मसान्तसम्मको तुलनामा ७३०.५८ प्रतिशतले बढी हो । गत वर्षको सोही अवधिमा कम्पनीको यो नाफा ८ करोड २१ लाख ३५ हजार रुपैयाँ रहेको थियो ।
उक्त अवधिमा कम्पनीको संचालन मुनाफा पनि ७५७.१० प्रतिशतले वृद्धि भई ५२ करोड ७२ लाख २३ हजार रुपैयाँ पुगेको छ । गत वर्षको पुस मसान्तसम्ममा कम्पनीको यो मुनाफा ६ करोड १५ लाख १२ हजार रुपैयाँ मात्र रहेको थियो ।
कम्पनीको चुक्ता पुँजी १ अर्ब ९६ करोड ८० लाख २७ हजार रुपैयाँ रहेको छ । कम्पनीले जगेडा कोषमा भने ८३ करोड १५ लाख ४२ हजार रुपैयाँ राखेको छ ।
कम्पनीको प्रतिसेयर आम्दानी २१ रुपैयाँ ६६ पैसा र प्रतिसेयर नेटवर्थ १४२ रुपैयाँ २५ पैसा रहेको छ ।
वि.सं.२०७८ माघ २५ मंगलवार १३:०८ मा प्रकाशित