काठमाडौं । हिमालयन जनरल इन्स्योरेन्स कम्पनीले वार्षिक साधारण सभाका लागि मिति तय गरेको छ । कम्पनीको २८औं वार्षिक साधारण सभा फागुन ३० गते हुने भएको हो ।
कम्पनीको फागुन ६ गतेको सञ्चालक समितिको बैठकले उक्त दिन सभा गर्ने निर्णय गरेको हो । सभा भर्चुअल माध्यमबाट हुने छ ।
सभामा लाभांश पारित गर्ने मुख्य एजेण्डा रहेको छ । सभाले ६.६५ प्रतिशत बोनस सेयर र कर प्रयोजनका लागि ०.३५ प्रीतशत नगद लाभांश पारित गर्नेछ ।
कम्पनीले अन्य कुनै कम्पनीलाई प्राप्ति गर्ने वा एकआपसमा गाभिने प्रयोजनका लागि उपयुक्त कम्पनीको पहिचान र छनौट गर्ने, समझदारीपत्रमा हस्ताक्षर गर्ने, सोको आधारमा सैद्धान्तिक स्वीकृतिको लागि बीमा समिति समक्ष निवेदन दिने, आवश्यकता अनुसार सम्पत्ति तथा दायित्व मूल्याङ्कन गर्न मूल्याङ्कनकर्ता नियुक्ति लगायत कार्यका लागि संचालक समितिलाई पूर्ण अख्तियारी दिने विशेष प्रस्ताव पारित गर्नेछ ।
सभाले गत आर्थिक वर्ष २०७७/७८ सम्मको वार्षिक प्रतिवेदन सहितका वित्तीय विवरणहरु पारित गर्नेछ ।
साधारण सभा प्रयोजनका लागि कम्पनीले फागुन १६ गते (एक दिन) बुक क्लोज गर्ने भएको छ ।
वि.सं.२०७८ फागुन ८ आइतवार १०:५६ मा प्रकाशित
