काठमाडौं । कोभिड–१९ ले नेपालको अर्थतन्त्रमा पारेको प्रभावको पहिचान गरी आर्थिक पुनरुत्थानको मोडल तयार पार्नका लागि प्रादेशिक उद्यमशिलता परिसंवाद हुने भएको छ ।
प्रदेश सरकार, नेपाल उद्योग परिसंघ (सिएनआई) र विशाल फाउन्डेसनले परिसंवादको संयुक्त आयोजना गर्ने भएका छन् । सोमबार नेपाल उद्योग परिसंघले उद्यमशिलता परिसंवादका लागि विशाल फाउन्डेसनसँग सम्झौता गरेको छ ।
यो परिसंवाद व्यवसायका प्राथमिकता र क्षेत्रहरु, पछिल्लो समय उद्यम व्यवसायमा परेको नकारात्मक प्रभाव र प्रदेशको आर्थिक सवलीकरणका सम्बन्धमा सरकार र नीजि क्षेत्रबीचको उच्चस्तरको हुने परिसंघले जनाएको छ ।
परिसंघका अध्यक्ष विष्णु कुमार अग्रवालका अनुसार परिसंवाद मार्फत आएका उद्यमीका मुद्दाहरुलाई तीनै तहको बजेट अगाडि नै सरकार समक्ष प्रस्तुत गरिने छ ।
विशाल फाउन्डेसनका अध्यक्ष नरेशप्रसाद श्रेष्ठले प्रदेश तथा स्थानिय तहका उद्यमीहरुको प्रर्वद्धन गर्नु रहेको र यो परिसंवादले निश्चय पनि प्रादेशिक स्तरमा उद्यमशिलता प्रर्वद्धन गर्न र युवा जमातलाई उद्यशिलतामा एकिकृत गर्नका लागि महत्वपुर्ण भुमिका खेल्ने बताए ।
परिसंवादमा प्रदेश भित्र कोभिडपछिको अर्थतन्त्र, आर्थिक पुनःउत्थानको रोडम्याप, डिजीटल अर्थतन्त्र र डिजिटल नेपाल फ्रेमवर्क, स्टार्टअप उद्यमका अवसर, महिला उद्यमशिलता, रोजगारी, कृषि र पर्यटन क्षेत्रमा नेपालको सम्भावना, दिगो विकासका लक्ष्य प्राप्ती लगायतका ५ देखि ७ वटा सेसनहरु रहने छन ।
वि.सं.२०७८ फागुन १० मंगलवार ११:५४ मा प्रकाशित