काठमाडौं । भोलि अर्थात फागुन ११ गते दुई कम्पनीले साधारण सभा गर्दैछन् ।
उक्त दिन महालक्ष्मी विकास बैंक र लाइफ इन्स्योरेन्स कम्पनीले वार्षिक साधारण सभा गर्न लागेका हुन् । यी दुवै कम्पनीको सभाले लाभांश पारित गर्ने मुख्य एजेण्डा रहेको छ ।
भोलि महालक्ष्मी विकास बैंकले २०औं वार्षिक साधारण सभा गर्ने भएको छ । बैंकको सभाले २१.०५३ प्रतिशत लाभांश वितरणको प्रस्ताव पारित गर्नेछ ।
बैंकले सेयरधनीहरुलाई २० प्रतिशत बोनस सेयर र कर प्रयोजनका लागि १.०५३ प्रतिशत नगद लाभांश दिने प्रस्ताव गरेको छ ।
यस अघि यो सभा कम्पनीले पुस २५ गते र माघ ३ गतेका लागि बोलाएको थियो । पुस २५ गते गणपूरक संख्या नपुगेपछि स्थगित सभा माघ ३ गतेका लागि पुनः बोलाइएको सभाका सम्बन्धमा सेयरधनीहरु गिरिराज पोखरेल र प्रमोद श्रेष्ठले पुस २९ गते बैंक समेतकाविरुद्ध दायर गरेको रिटमा माघ ३ गतेका लागि नै पेशी तोकिएकाले स्थगित भएको थियो ।
उक्त रिटका सम्बन्धमा उच्च अदालत पाटनबाट जारी भएको अल्पकालिन अन्तरिम आदेशलाई निरन्तरता दिनु परेन भन्ने आदेश प्राप्त भएसँगै कम्पनीले सभा बोलाएको हो ।
सभाले गत आर्थिक वर्ष २०७७/७८ सम्मको वार्षिक प्रतिवेदन सहितका वित्तीय विवरणहरु पारित गर्ने, चालु आवको लागि लेखापरीक्षक नियुक्ति र निजको पारिश्रमिक निर्धारण लगायतका एजेण्डा पारित गर्नेछ ।
सभा प्रयोजनका लागि कम्पनीले पुस १३ गते एक दिन बुक क्लोज गरेको थियो ।
यस्तै, भोलि बुधवार लाइफ इन्स्योरेन्स कर्पोरशेन नेपालले फागुन ११ गते वार्षिक साधारण सभा गर्ने भएको छ ।
सभाले आव २०७६/७७ को मुनाफाबाट सेयरधनीहरुलाई २१ प्रतिशत लाभांश वितरणको प्रस्ताव पारित गर्नेछ ।
कम्पनीले सेयरधनीहरुलाई २० प्रतिशत बोनस सेयर र कर प्रयोजनका लागि १ प्रतिशत नगद लाभांश दिने भएको हो । सभा प्रयोजनका लागि कम्पनीले माघ २४ गते बुक क्लोज गर्ने भएको छ ।
वि.सं.२०७८ फागुन १० मंगलवार १३:५३ मा प्रकाशित