काठमाडौं । चालु आर्थिक वर्षको ७ महिनामा करिब साढे तीन अर्बको विद्युतीय सवारी आयात भएको छ ।
भन्सार विभागले हालै सार्वजजिनक गरेको तथ्याङ्क अनुसार चालु आवको माघ मसान्तसम्ममा ३ अर्ब ४९ करोड ७८ लाख ७३ हजार रुपैयाँ बराबरको विद्युतीय सवारी आयात भएको हो ।
उक्त अवधिमा विभिन्न तौल क्षमताका १ हजार १०१ वटा विद्युतीय कार, जीप र भ्यान आयात भएको विभागले जनाएको छ । यी मध्ये १०० किलोवाट तौल क्षमतादेखि ३०० किलोवाटसम्मका रहेका छन् । विद्युतीय सवारी आयातबाट सरकारले ९६ करोड ७७ लाख ५७ हजार रुपैयाँ राजश्व संकलन गरेको छ ।
एक महिनाको अवधिमा अर्थात चालु आवको पुस मसान्तको तुलनामा भने विद्युतीय सवारी आयात ७.८४ प्रतिशत (२५ करोड ४५ लाख ५३ हजार रुपैयाँ) ले बढी हो । चालु आवको पुस मसान्तसम्म नेपालमा ३ अर्ब २४ करोड ३३ लाख २० हजार रुपैयाँ बराबरको विद्युतीय सवारी आयात भएको थियो ।
माघ महिनासम्म नेपालमा सबैभन्दा बढी चीनबाट मात्रै २ अर्ब २१ करोड २० लाख ४८ हजार रुपैयाँ बराबरको ७४६ वटा विद्युतीय सवारी नेपाल भित्रिएको छ । जसमध्ये १०० किलोवाट क्षमताका ९० वटा र १५० देखि २०० किलोवाट क्षमताका ६५६ वटा विद्युतीय कार, जीप र भ्यान रहेका छन् ।
यस्तै, भारतबाट ७७ करोड ४० लाख ४५ हजार रुपैयाँ बराबरको २०९ वटा, कोरियाबाट ३३ करोड ७० लाख ६६ बराबरको ९२ वटा र जापानबाट १० करोड ८८ लाख २ हजार रुपैयाँ २८ वटा विद्युतीय सवारी नेपाल भित्रिएको छ ।
त्यसैगरि उक्त अवधिमा अमेरिकाबाट ६ करोड २४ लाख ५० हजार रुपैयाँ बराबरको विभिन्न तौल क्षमताका १५ वटा विद्युतीय कार, जीप र भ्यान आयात भएको छ भने फ्रान्सबाट ३४ लाख ६२ हजार रुपैयाँ बराबरको १ वटा आयात भएको छ ।
वि.सं.२०७८ फागुन १२ बिहीवार १४:४७ मा प्रकाशित