काठमाडौँ । नेपाल राष्ट्र बैंकले भोली (फागुन २५ गते) देखि एक रुपैयाँको सिक्का प्रचलनमा ल्याउन लागेको छ । राष्ट्र बैंकका अनुसार हाल चलन चल्तिमै रहेको सिक्काको आकार तथा सुनौलो रङ्गमा टकमरी गरिएको साल २०७७ लेखिएको नयाँ सिक्का प्रचलनमा ल्याउन लागिएको हो ।
भोलीदेखि प्रचलनमा आउने सिक्काको विशेषताहरु
(क) सिक्काको अग्र भागमाः
–सिक्काको वृत्ताकार घेराभित्र चौसठ्ठी वटा थोप्लाहरु रहेको ।
–चौसठ्ठी थोप्लाहरूको वृत्ताकार घेराभित्र हिमाल, पहाड र तराईको पृष्ठभूमिमा सात प्रदेशसहितको नेपालको नक्सा रहेको ।
–सिक्काको माथिल्लो भागमा अंग्रेजीमा Re.One र तल्लो भागमा देवनागरी
लिपिमा १ रुपैयाँ लेखिएको
–नेपालको नक्शाको दायाँतर्फ फरक क्षमता भएका (दृष्टिविहीन)हरुले स्पर्श
गरेर सिक्काको दर पहिचान गर्नका लागि एउटा मोटो थोप्लो रहेको ।
(ख) सिक्काको पछाडीको भागमाः
–सिक्काको वृत्ताकार घेराभित्र चौसठ्ठी वटा थोप्लाहरु रहेको ।
–आठ थोप्ला सहितको वृत्ताकार चित्र भित्रको वर्गाकार आकृतिलाई वरिपरी
चन्द्र, सूर्य, चक्र, संख, पद्म, गदा तथा बिचमा सगरमाथाको आकृति र सो
आकृतिको मुनी अंग्रेजीमा SAGARMATHA NEPAL लेखिएको ।
–सिक्काको माथिल्लो भागमा देवनागरी लिपिमा नेपाल र तल्लो भागमा २०७७
लेखिएको ।
वि.सं.२०७८ फागुन २४ मंगलवार १३:५८ मा प्रकाशित
