काठमाडौं । नेपाल राष्ट्र बैंकले एक रुपैयाँको नयाँ सिक्का प्रचलनमा ल्याएको छ । बैंकले हाल चलन चल्तिमै रहेको सिक्काको केही फरक विशेषतासहित नयाँ सिक्का प्रचलनमा ल्याएको हो ।
बैंकले सिक्काको आकार तथा सुनौलो रङ्गमा टकमरी गरिएको साल २०७७ लेखिएको नयाँ सिक्का प्रचलनमा ल्याएको जनाएको छ ।
उक्त सिक्काको वृत्ताकार घेराभित्र चौसठ्ठी वटा थोप्लाहरु रहेको, चौसठ्ठी थोप्लाहरूको वृत्ताकार घेराभित्र हिमाल, पहाड र तराईको पृष्ठभूमिमा सात प्रदेशसहितको नेपालको नक्सा रहेको राष्ट्र बैंकले जनाएको छ ।
सिक्काको माथिल्लो भागमा अंग्रेजीमा र तल्लो भागमा देवनागरी लिपिमा १ रुपैयाँ लेखिएको छ । नेपालको नक्शाको दायाँतर्फ फरक क्षमता भएका (दृष्टिविहीन)हरुले स्पर्श गरेर सिक्काको दर पहिचान गर्नका लागि एउटा मोटो थोप्लो रहेको छ ।
यस्तै, सिक्काको वृत्ताकार घेराभित्र चौसठ्ठी वटा थोप्लाहरु, आठ थोप्ला सहितको वृत्ताकार चित्र भित्रको वर्गाकार आकृतिलाई वरिपरी चन्द्र, सूर्य, चक्र, संख, पद्म, गदा तथा बिचमा सगरमाथाको आकृति र सो आकृतिको मुनी अंग्रेजीमा SAGARMATHA NEPAL लेखिएको छ ।
उक्त नयाँ सिक्काको माथिल्लो भागमा देवनागरी लिपिमा नेपाल र तल्लो भागमा २०७७
लेखिएको राष्ट्र बैंकले जनाएको छ ।
वि.सं.२०७८ फागुन २५ बुधवार १०:३६ मा प्रकाशित